''Antalyaspor''da qəribə olaylar yaşanır. Baş məşqçi Əmrə Belözoğlunun bir müddət öncə rəhbərliklə yaşadığı fikir ayrılığı üzündən istefa verdiyini xəbər vermişdik.

Daha doğrusu 45 yaşlı mütəxəssisi klubun faktiki olaraq iki prezident tərəfindən idarə olunması qane etmirdi. ''Antalyaspor''da klub prezidenti qədər dərnək prezidenti də söz sahibidi. Ancaq görünür, bu məsələni yoluna qoymaq mümkün olub. Çünki klubdan verilən rəsmi açıqlamada Əmrə Belözoğlunun istefa qərarından vaz keçdiyi və mövsümöncəsi hazırlıq dönəmində ''Antalyaspor''un başında yer alacağı qeyd olunub. Elə məşqçi özü də öz səhifəsində paylaşım edərək ''Antalyaspor''u layiq olduğu yerə daşımaq üçün var gücü ilə çalışacağını bildirib və ona etibar edən rəhbərliyə, eləcə də fanatlara təşəkkür edib.

Xatırladaq ki, daha öncə ''İstanbul BŞ'' və ''Ankaragücü''nü çalışdırmış Belözoğlu yanvardan etibarən bu vəzifəni icra edir. ''Antalyaspor'' bu məşqçi ilə keçirdiyi 20 rəsmi oyundan 6 qələbə, 5 heç-heçə, 9 məğlubiyyətlə ayrılıb.