Türkiyə çempionatından daha bir istefa xəbəri var. “Samsunspor” Hüseyin Əroğlu ilə yollarını ayırdığını rəsmən açıqladı.

50 yaşlı mütəxəssis bu vəzifəyə təxminən bir il öncə gətirilmişdi. Daha öncə uzun illər “Altınordu”da çalışaraq Çağlar Söyüncü, Cengiz Ündər kimi ulduzların yetişməsində mühüm rol oynayan Eroğlu ilk cəhddəcə “Samsunspor”u 1-ci liqanın çempionu edərək 11 illik fasilədən sonra komandanı superliqaya daşımışdı. Amma elitada işlər qaydasında getmədi. “Samsunspor” 5 oyuna cəmi 1 xal toplayaraq turnir cədvəlinin sonuncu pilləsində qərarlaşıb. Son turda “Antalyaspor”a 0:2 hesablı məğlubiyyət fanatların səbr kasasını daşırdı. Sosial şəbəkədə fanatlar arasında keçirilən sorğuda onların böyük əksəriyyəti problemin Əroğludan qaynaqlandığını bildirərək məşqçinin istefasını tələb etdilər.

Maraqlıdı ki, Əroğlu vəziyyətin düzələcəyinə inanırdı. “Antalyaspor”la matçın ardından o, istefa vermək niyyətinə olmadığını və ilk qələbədən sonra hər şeyin düzələcəyini bildirmişdi. Amma dünən rəhbərliklə məşqçi arasındaskı görüşdən istefa qərarı çıxdı. “Samsunspor” əvvəlcə Sərgən Yalçına təklif göndərsə də, bu məşqçinin illik 2 milyon avroya yaxın məvacib tələb etməsi işləri qəlizləşdirib. Hazırda Əroğlunu əvəzləməyə ən real namizəd Aykut Kocamandı. Superliqada cəmi 6 tur arxada qalsa da, artıq 5 klubda məşqçi dəyişikliyi baş verib.

“Samsunspor”dan öncə “İstanbulspor”, “İstanbul BŞ”, “Qaziantep” və “Kayserispor”dan da istefa xəbəri gəlmişdi.