Türkiyə çempionatından növbəti istefa xəbəri var. 8-ci turda ''Kocaelispor''a minimal hesabla məğlub olan ''Eyüpspor''da baş məşqçi Səlcuk Şahin oyundan sonra istefa verib.

Rəhbərlik onun istefasını qəbul edib. Bu, debütant ''Kocaelispor''un mövsümdəki ilk qələbəsi olub.

Xatırladaq ki, ''Eyüpspor'' ötən mövsüm tarixində ilk dəfə elitada çıxış etmiş və Arda Turanın başçılığı altında 6-cı pilləni tutmuşdu. Arda bu yay ''Şaxtyor''un başına keçdiyindən İstanbul təmsilçisi yeni məşqçi axtarışına çıxdı və üstünlüyü Şahinə verdi. Bu, 44 yaşlı Səlcuk Şahinin müstəqil məşqçi kimi ilk təcrübəsi idi.

Buna qədər o, Türkiyə yığmasında Vinçentso Montellanın köməkçisi qismində çalışırdı. ''Eyüpspor'' bu mütəxəssislə 8 oyundan 1 qələbə, 2 heç-heçə, 5 məğlubiyyətlə ayrılaraq yalnız 5 xal toplaya bildi.

Qeyd edək ki, bu, cari mövsüm Türkiyə çempionatında baş tutan artıq 5-ci istefadı. Əvvəlki həftələrdə ''Qaziantep'' İsmət Taşdəmir ilə, ''Beşiktaş'' Ole Qunnar Sulşer ilə, ''Fənərbaxça'' Joze Mourinyo ilə və ''İstanbul BŞ'' Çağdaş Atan ilə yollarını ayırmışdı.