Türkiyə futbolunda tək məşqçilərin yox, klub prezidentlərinin də istefasına tez-tez rast gəlinir. Belə bir hal dünən ''Gənclərbirliyi''də yaşanıb. Paytaxt təmsilçisinin başqanı Osman Sungur səhhəti ilə bağlı problemləri və şəxsi məsələləri əsas gətirərək istefa verib.

"Football-plus.az" xəbər verir ki, o, bu vəzifəyə ötən ilin martında baş tutan növbədənkənar seçkilərdə qalib gəlməklə seçilmişdi.

Maraqlıdı ki, bir neçə ay öncə, iyunun 14-də keçirilən seçkilərdə də qalib gəlmişdi. Sungurun dönəmində ''Gənclər'' superliqaya qayıtmağı bacardı. Bu mövsüm debütant statusunda olan komanda 8 tura 5 xal toplayıb və hazırda 14-cü pillədə qərarlaşıb. Bu arada istefa xəbərinin ardından klubun 200-yə yaxın azarkeşi bazanın önündə toplaşaraq etiraz edib.

Belə ki, yayılan iddialara görə ''Gənclər''in yeni prezidenti seçkilər olmadan, yəni idarə heyəti tərəfindən seçiləcək. Fanatlar isə növbədənkənar seçkilərin keçirilməsini və prezidentin klub üzvlərinin səsverməsi ilə seçilməsini tələb edirlər.