Dünən ''Beşiktaş'' camiəsində böyük maraq və səbirsizliklə gözlənilən növbədənkənar prezident seçkiləri keçirildi.

Əsas namizədlər Hüseyin Yücəl ilə Sərdar Adalı idi. ''Sinan Ərdəm'' idman salonunda keçirilən seçkilərdə Sərdar Adalı tarixi bir səslə qalib gəldi. Açılan 25 sandığın nəticələrinə görə Adalı 8901, Yücəl isə 3637 səs topladı. Buna qədər rekord ötən ilin dekabrındakı növbədənkənar seçkilərdə qeydə alınmışdı.

Həmin vaxt Hasan Arat 7271 səs toplayaraq məhz elə Sərdar Adalıya qalib gəlmişdi. Amma Aratın prezidentlik dönəmi bilindiyi kimi böyük bir fiasko və xaosla müşayiət olundu. O, bir ili tamam olmamış istefa verdi. Beləliklə 4-cü cəhddən nəhayət ki, istəyinə çatan Adalı ''Beşiktaş'' tarixinin 37-ci prezidenti oldu. O 2013, 2019, 2024-cü illərdə namizədliyini irəli sürmüş və məğlubiyyətlə barışmalı olmuşdu.

60 yaşlı Adalı eyni zamanda Türkiyə Jokey Klubunun prezidentidi. O daha öncə ''Qartal''da 2010-11-ci illərdə vitse-prezident, 2018-19-cu illərdə isə ikinci prezident vəzifələrini icra etmişdi. Məhz onun vitse-prezident işlədiyi dönəmdə ''ağ-qaralar'' Kuareşma, Almeyda, Fernandeş, Simao, Quti kimi ulduzları transfer etmişdi. Amma həmin heyət ciddi uğur qazana bilməmişdi.

ƏLİ