Hər zaman hakimliklə bağlı problemləri ilə diqqət çəkən Türkiyə futbolunda yeni xəbər var.

Belə ki, Türkiyə Futbol Federasiyasının nəzdində fəaliyyət göstərən Hakimlər Komitəsinin prezident Sabri Çelik başda olmaqla tam tərkibdə istefa verib. Federasiya istefanı qəbul edib. Xatırladaq ki, daha öncə 2004-05-ci illərdə və 2019-da eyni vəzifəni icra edən Çelik ötən ilin martında 3-cü dəfə komitənin sədri seçilmişdi. İstefanın məhz indi gəlməsinin səbəbi bəlli deyil. Onsuz da klublar mövsümün əvvəlindən bəri hakimlikdən narazı idi. Deyilənə görə federasiya prezidenti Mehmet Büyükekşi özü şəxsən Çelikdən istefa verməsini tələb edib. Maraqlıdı ki, son 10 illik dönəmə nəzər salsaq, HK sədrinin 8-ci dəfə istefa verdiyini görərik! Komitənin yeni sədrinin kim olacağı hələ ki, məlum deyil. Amma sürpriz isimlərin adları hallanır. Bunlardan biri Lalə Ortadı. 63 yaşlı Orta Türkiyənin ilk xanım məşqçisi və ilk xanım hakimi kimi tanınır. O, həvəskar və peşəkar səviyyədə 1500-dən çox oyun idarə edib. Son dönəmlərdə Lalə Orta ''Bein Sports'' kanalında Dəniz Çoban və Bülənt Yıldırım ilə birlikdə superliqa oyunlarının hakim qərarlarını şərh edirdi. Orta seçiləcəyi təqdirdə HK-nın ilk qadın prezidenti kimi tarixə düşəcək. Namizədlər arasında Kuddusi Müftüoğlunun da adı hallanır. Bu arada Cüneyt Çakır və ya Fırat Aydınusdan birinin də başqan seçilməsini istəyənlər var. Amma onlar peşəkar hakimlik karyeralarını ötən yay, yəni 6 ay öncə başa vurublar. Federasiyanın qaydalarına əsasən HK sədri seçiləcək şəxsin karyerasını bitirməsinin üstündən ən azı 1 il ötməlidi. Yəni Çakırın bu vəzifəyə gəlməsi üçün bu qayda dəyişməlidi.