“Kristal Pelas”ın aqibəti müəyyənləşib.

"Football-plus.az" xəbər verir ki, İngiltərə klubu Avropa Liqasında (AL) oynamayacaq.

UEFA bir neçə həftə idi London təmsilçisi ilə bağlı araşdırma aparırdı. Problem “Kristal Pelas”ın sahibi olan amerikalı biznesmen Con Tekstorun eyni zamanda “Lion”a himayədarlıq etməsi ilə bağlı idi. Fransa klubu da AL-də çıxış etmək hüququ qazanmışdı. Lakin UEFA-nın turnirlərin reqlamentinə əsasən, eyni sahibə malik klublar bir avrokubokda iştirak edə bilməzdilər. Seçim qarşısında qalan qitənin futbol qurumunun müvafiq komitəsi “Lion”un “2-ci dərəcəli” turnirdə iştirakını təsdiqləyib. “Kristal Pelas” isə İngiltərəni bu mövsüm AL-də yox, Konfrans Liqasında təmsil edəcək.

Xatırladaq ki, Londondan olan komanda ötən mövsüm finalda “Mançester Siti”ni minimal hesabla məğlub etməklə İngiltərə kubokunu qazanıb. “Kristal Pelas”ın premyer-liqada mövsümü 12-ci yerdə başa vurduğunu da qeyd edək. Paytaxt təmsilçisinin UEFA-nın qərarından apellyasiya vermək hüququ var. Londonlular AL-dəki çıxışını bərpa etmək üçün İdman Arbitraj Məhkəməsinə müraciət edə bilərlər.