''Fənərbaxça'' camiəsində baş məşqçi mövzusu, nəhayət, həllini tapdı. Başqan Əli Koçun açıqlamalarından sonra Domeniko Tedeskonun əsas namizədə çevrildiyini xəbər vermişdik.

Bu proqnozlar doğruldu. İtaliyalı mütəxəssis ''Fənər''in yeni baş məşqçisi təyin olundu.

Tedeskonun yalnız bir titulu var!
40 yaşlı məşqçi klubun idman direktoru Devin Özəklə birlikdə çərşənbə axşamı xüsusi təyyarə ilə İstanbula gəldi. Klubdan verilən məlumatda onunla ikiillik müqavilə imzalandığı qeyd olundu. Amma Tedeskonun maaşı barədə hələlik heç bir məlumat yoxdu.

Tedesko ilə yanaşı, daha bir maraqlı təyinat diqqəti çəkib. Belə ki, onun köməkçilərindən biri Gökhan Gönül olacaq. ''Fənər''lilər Gökhan Gönülü çox gözəl xatırlayır. O, iki fərqli dönəmdə (2007-16, 2020-21) ''sarı-lacivərdlilər''də ümumilikdə 361 rəsmi oyunda forma geyib və kapitan sarğısını da daşıyıb. Hazırda 40 yaşı olan Gönül məşqçi karyerasına yeni başlayıb. Onun ilk iş yeri Türkiyənin gənclər yığması olmuşdu.

İndi isə Tedesko ilə bir qədər ətraflı tanış olaq. Bu mütəxəssis 1985-ci ildə İtaliyada doğulsa da, 2 yaşı olarkən ailəsi ilə Almaniyaya köçüb və demək olar, həyatının böyük hissəsini bu ölkədə keçirib. Ona görə də onun İtaliya ilə yanaşı, Almaniya vətəndaşlığı da var. Tedeskonun faktiki futbolçu karyerası olmayıb - yalnız Almaniyanın həvəskar klublarında forma geyib. Məşqçiliyə isə 2013-cü ildə, yəni 28 yaşında ''Ştutqart''ın akademiyasında başlayıb. Tedesko məşqçi lisenziyasını 2016-cı ildə alıb. Özü də o, akademiyanı birlikdə oxuduğu Almaniya yığmasının indiki baş məşqçisi Yulian Naqelsmanndan daha yaxşı göstəricilərlə tamamlamışdı. ''Ştutqart'' və ''Hoffenhaym''ın akademiyasında çalışdıqdan sonra, eləcə də heç bir təcrübəsi olmamasına baxmayaraq, ''Ertsgebirge''ni çətin vəziyyətdə qəbul edərək 2-ci bundesliqada saxlamağın ardından Tedesko 2018-ci ildə ''Şalke-04''ün başına keçdi. Bu kluba ilk mövsümdəcə gümüş medalları qazandırdı və növbəti mövsümdə ÇL-in 1/8 finalına daşıdı.

Düşünmək olardı ki, belə başlanğıcdan sonra istedadlı məşqçinin karyerası yalnız inkişaf edəcək. Amma heç də belə olmadı. 2019-un oktyabrında o, sürpriz qərarla ''Spartak''ın başına keçdi və 2021-in yayına qədər Rusiyada çalışdı. Burda seçdiyi oyun tərzinə görə fanatlar tərəfindən sevilsə də, heç bir ciddi uğur qazana bilmədi və yalnız 2-ci yeri tutaraq ''Spartak''ı ÇL-in təsnifatına daşımaqla kifayətləndi.

Tedesko 2021-in dekabrında ''Leyptsiq''in başına keçdi. Klubu 11-ci pillədə qəbul etməsinə baxmayaraq ÇL-ə vəsiqə qazandı. Ən əsası ''öküzlər'' həmin mövsümün sonunda ölkə kubokuna sahib çıxmaqla tarixlərinin ilk titulunu qazandılar. Bu, Tedeskonun məşqçi karyerasının yeganə “dişə vurulası” uğurudu! 2022-nin sentyabrında uğursuz nəticələrə görə qovulan məşqçinin sonuncu iş yeri isə Belçika yığması oldu. 2023-ün fevralında bu vəzifəyə gətirildi və Belçika onun dönəmində ilk məğlubiyyətini yalnız 14 aydan sonra - AÇ-2024-ün 1/8 finalında Fransa ilə oyunda yaşadı. Sonradan komandada böhran başladı. Futbolçularla Tedeskonun münasibətləri pozuldu. Belçika Millətlər Liqasının qrup mərhələsində zəif çıxış edincə, italiyalı mütəxəssis bu ilin yanvarında istefaya göndərildi. Alman, italyan, ingilis və ispan dillərini bilən Tedesko dominant, aqressiv və kombinasiyalı oyuna üstünlük verir. Ancaq onun karyerasından göründüyü kimi bu üslub heç də həmişə lazımi nəticə qazandırmır. 

''Klubun ənənələrinə ən çox uyğun gələn məşqçini gətirdik''
Fanatlar bu təyinatdan narazı qalıb. Onlar İsmayıl Kartalın gəlişinin tərəfdarı idi. Mourinyo kimi titullu məşqçidən sonra yalnız bir titulu olan məşqçinin gətirilməsinin birmənalı qarşılanmaması təbiidi. Tedeskonun təyinatı açıqlandığı gün Əli Koçun istefası ilə bağlı paylaşımlar və heşteqlər yenə sosial şəbəkələrin bəzəyinə çevrilmişdi. 
Maraqlıdı ki, İstanbul nəhəngi Tedeskodan öncə Zinəddin Zidana rəsmi təklif irəli sürübmüş. Bu iddianı təkcə Türkiyə yox, Avropa mətbuatı da ortaya atıb. Almaniya mətbuatı təklifin detallarını da açıqlayıb. Amma fransalı əfsanəni Türkiyəyə gəlməyə razı salmaq mümkün olmayıb. 2021-ci ildən işsiz olan və bu müddətdə bir çox önəmli klubun təkliflərini geri çevirən Zidanın Türkiyədə işləməyə razılıq verməsi zatən sürpriz olardı. Onun əsas hədəfi Fransa yığmasının başına keçməkdi və DÇ-2026-dan sonra Zizu bu hədəfi reallaşdıracaq.

Tedesko 118 illik ''Fənərbaxça'' tarixinin 79-cu baş məşqçisidi. Bu məşqçilərdən 42-si əcnəbi, 37-si yerli olub. Klub tarixində daha öncə yalnız bir italiyalı məşqçi işləyib. Söhbət Zdenek Zemandan gedir. Ancaq 1999/00 mövsümünün gedişində baş məşqçi postuna gətirilən bu mütəxəssis superliqada cəmi 10 oyuna çıxandan sonra istefaya göndərilmişdi! O, klubun tarixində ən qısa müddət çalışmış məşqçilərindəndi. Başqan Əli Koç bu təyinatla bağlı bunları deyib: