Son dönəmlərdə bir qədər gözdən itən Gökhan Gönül karyerası ilə bağlı yekun qərarını açıqlayıb.

"Football-plus.az" xəbər verir ki, 38 yaşlı təcrübəli müdafiəçi bustlarını birdəfəlik mismardan asmaq qərarına gəlib.

Gökhan sosial şəbəkədəki səhifəsində karyerasının maraqlı məqamlarının, qollarının, qazandığı titulların yer aldığı birdəqiqəlik video paylaşıb. O, məhz həmin videoda vida sözlərini dilə gətirərək futbolsevərlərlə birdəfəlik vidalaşıb.

Qeyd edək ki, 1985-ci il təvəllüdlü Gökhan “Gənclərbirliyi”nin yetirməsi olsa da, peşəkar karyerasına Ankaranın digər klubu olan “Hacettepe”də başlayıb. Türkiyə onu 2007-ci ildə “Fənərbaxça”ya transferindən sonra tanımağa başladı. “77” nömrəli forması, bitmək bilməyən enerjisi, hirsi, sağ cinahdakı reydləri ilə yaddaşlarda iz buraxan Gökhan ardıcıl 9 il “Fənər”də oynayaraq böyük populyarlıq qazandı. Daha sonra 4 il (2016-20) “Beşiktaş”da top qovan Gönül yenidən “Fənərbaxça”ya qayıdaraq 2020/21-i burda keçirdi. Onun karyerasının son klubu isə “Çaykur Rizəspor” oldu. Rizə təmsilçisi 2021/22-də elitanı tərk edərək aşağı liqaya yuvarlandı. Ötən mövsüm isə Gökhan bu komanda ilə aşağı liqada 5 oyuna çıxandan sonra məşqçilər korpusu ilə sözü çəp gəldiyi üçün əvəzedici heyətə göndərildi. Çox keçmədən bu klubla yollarını birdəfəlik ayırdı. Yəni o, son bir ili faktiki boşa verdi.

Gökhan klub karyerasında 535 oyuna çıxaraq 24 qol, 69 məhsuldar ötürmə ilə fərqləndi. O, 2-si “Fənərbaxça”da, 1-i “Beşiktaş”da olmaqla 3 dəfə çempionluq sevinci yaşayıb. Yığma komandada isə 2007-19-cu illərdə 66 oyuna çıxaraq 1 qol vurub.