“Fənərbaxça” ilə bağlı maraqlı xəbərlər gəlməkdədi. İstanbul nəhəngi belə desək, hər cəhətdən yenidən qurulur.

"Football-plus.az" xəbər verir ki, artıq 4 futbolçu – Edin Ceko, Duşan Tadiç, Alan Sen-Maksimen və nəhayət, Filip Kostiç ilə yollar ayrılıb. 2023-dən bəri idman direktoru vəzifəsini icra edən Mario Branko ilə də rəsmən əlaqələr kəsilib.

Brankonun bu vəzifəni icra etdiyi 2 il ərzində yeni oyunçuların alınmasına və icarəyə götürülməsinə ümumilikdə 114 milyon avro xərclənildi! Bu müddət ərzində heç də az məbləğ ödənilməyən, amma ümidləri doğrultmayan Dieqo Karlos, Cengiz Ündər, Rodriqo Bekao, Ləvənt Mercan kimi futbolçular kluba gəldi. Amma digər tərəfdən Brankonun dönəmində “Fənər” satışdan heç də az gəlir əldə etmədi. Arda Gülər, Fərdi Kadıoğlu, Altay Bayındır kimi isimlər də daxil olmaqla “sarı-lacivərdlilər” satışdan 99 milyon avro qazandılar.

Ən qısa müddətdə Joze Mourinyonun üç köməkçisi - Savatore Foti, Covanni Serra və Luka Fatiqa istefaya göndəriləcək. Gənc və kluba qəlbən bağlı olan kadrlara üstünlük vermək istəyən başqan Əli Koç yeni mövsümün komandasını qurmaq öhdəliyini Almaniyada doğulan Devin Özəklə İtaliyada təhsil alan Okan Özkan kimi isimlərə həvalə etmək niyyətindədi. Onlardan birinin 34, digərinin 30 yaşı var. Devin Özək 2021-dən bəri “Bayer-04”də baş skautun köməkçisi vəzifəsini icra edirdi. B lisenziyasına malik olan, türk, alman və ingilis dillərində danışmağı bacaran Özək Qrimaldo, Bonifeys, Caka kimi futbolçuların Levekuzen klubuna transferində mühüm rol oynamışdı. Eləcə də onun fəaliyyəti sayəsində Beyli 32 milyon, Diabi isə 55 milyon avroya “Aston Villa”ya transfer olunmuşdu.

İddialara inansaq, komandanın əfsanəvi isimlərindən olan Tuncay Şanlı geri dönüb! O, icraçı menecer funksiyasını yerinə yetirəcək. Mouriyonun yeni köməkçilərindən biri böyük ehtimalla Gökhan Gönül olacaq. Volkan Dəmirəlin təklifi qəbul etməməsinin ardından rəhbərlik məhz Gökhan Gönülə təklif irəli sürüb. 40 yaşlı Gönül sonuncu dəfə Türkiyənin gənclər yığmasını çalışdırırdı.