1999/2000 mövsümündə "Rasinq"in ispaniyalı hücumçusu Salva Balyesta 27 qolla La Liqanın bombardiri olur.

"Malaqa"nın braziliyalı forvardı Katanya 24 qolla onu izləyir. Salva 2000-ci ilin yayında gözlənilmədən elitanı tərk edən "Atletiko"nun sıralarına qoşulur. Növbəti mövsüm Balyesta 20 qolla sequndanın da bombardiri olur. Amma bu qollar "hindular"ı görməyə öyrəşdiyimiz yerə qaytarmır.

Maraqlıdı ki, Salva həmin mövsüm sözügedən yarışda "Tenerife"nin gənc hücumameyilli yarımmüdafiəçisi Luis Qarsiyanı da qabaqlayır. "Barselona" yetirməsi olan, gələcəkdə "Atletiko"da parlayacaq, qısa müddətdə "Liverpul" azarkeşlərinin sevimlisinə çevriləcək oyunçu o vaxt futbolda ilk uğurlu addımlarını atırdı.

Bir il əvvəl Balyesta ilə La Liqada bombardirlik uğrunda yarışmış Katanya isə həmin vaxt sequndanın bombardiri statusunda idi. Salvanın qolları "Atletiko"ya yüksəlməyə kifayət etməsə də, 1999-cu ildə Katanyanın sequndada vurduğu 25 qolla zirvədə qərarlaşması "Malaqa"nın La Liqa yolunu açmışdı.

İnsafən, braziliyalı daha ciddi rəqabətlə sözügedən titulu qazanmışdı. Həmin mövsüm sequndanın bombardirləri siyahısında stajlı azarkeşlərin hələ "Malyorka"dan yaxşı xatırlayacağı, geniş kütlənin isə "Deportivo"nun əfsanələri kimi xatırladığı Albert Luke və Dieqo Tristan cütlüyünü görmək mümkün idi. İspaniyalılar o vaxt "Malyorka"nın B komandasında oynayırdılar. Gələcək Avropa çempionu, yunanıstanlı pleymeyker Vasilis Sartas isə "Sevilya"nın bombardiri idi. Sonradan yolu "Milan" və "Atletiko"dan düşəcək Xavi Moreno da "Numansiya"nın uğurları üçün çalışırdı. Tristan ilə Moreno 2 il sonra artıq La Liqada bombardirlik uğrunda yarışacaqlar.

Yeri gəlmişkən, cari mövsüm uzun fasilədən sonra avrokuboklarda gücünü sınayan "Rayo Valyekano" sonuncu dəfə Avropa arenasında (UEFA kuboku) çıxış edəndə 1/4 finalda komandanın qarşısını liderlərindən biri Xavi Moreno olan "Alaves" almışdı. Bəli, 2001-ci ildən söhbət gedir. 5:4 başa çatan "Liverpul" - "Alaves" finalının baş tutduğu mövsümdən...

Salva ilə Katanyaya gəlincə, "Malaqa"nın tarixində ən çox qol vurmuş futbolçuların siyahısına nəzər salsaz, bu iki oyunçunun adı müxtəlif pillələrdə qarşınıza çıxacaq. Balyesta İspaniya yığmasında 4 oyun keçiribsə, İspaniya vətəndaşlığını qəbul etmiş Katanya 3 dəfə “La Furiya”nın formasında meydana çıxıb. İkisi də rəqabətin qızğın vaxtında - 2000-ci ildə yığmada debüt etsə də, heç vaxt çiyin-çiyinə və ya eyni matçda meydanda olmayıblar.

ELZAMİN HACIYEV