Mayın 23-də - “Fiorentina” ilə ev oyununda “Kalyari”nin qocaman baş məşqçisi Klaudio Ranyerinin emosional vidasının şahidi olduq.

Futbolda iz qoymaqla yanaşı, 72 yaşlı mütəxəssisin karyerasında təzadlar da çoxdu. Bu təzadlardan birini dəfələrlə dilə gətirmişəm. Bir daha bölüşmək yerinə düşər. Məncə, Ranyerinin 2000-ci ildə "Atletiko"nun La Liqanı tərk etməsinə səbəb olduğu (martda qovulmuşdu) komanda sırf heyət cəhətdən 2016-cı ildə İngiltərədə çempionu etdiyi "Lester"dən daha zəngin, potensiallı və keyfiyyətli idi. "Tülkülər"in çempion heyətini, yəqin ki, az-çox xatırlayırsız. Mən isə "Atletiko"nun 2000-ci ildə sequndaya yuvarlanan heyətindən bəzi futbolçuları qeyd edəcəm.

Cimmi Floyd Hasselbaynk
Həmin mövsüm ümumilikdə 47 oyunda 35 qol vurmuş niderlandlı forvard La Liqada sona qədər bombardirlik uğrunda yarışmış və yekunda 24 qolla Salvadan 3 top geri qalmışdı. Kubokda isə bu göstəricidə zirvədə yer almışdı. Cimminin 1999-cu ildə Ouen və York ilə premyer-liqanın şərikli bombardiri (18 qol), Berqkampla birlikdə isə həm də ən yaxşı assistenti (13) olduğunu da vurğulamağa dəyər. Bütün bunları o, "Lids"in heyətində bacarmışdı. "Atletiko" sequndaya düşəndən sonra yenidən İngiltərəyə - bu dəfə "Çelsi"yə yollanan forvard 2001-ci ildə də premyer-liqanın bombardiri olmuşdu. Özü də bu dəfə 23 qol vurmaqla təkbaşına. Həmin dövrdə Klyuvert və Van Nistelroy fürsət yaradanda Niderland yığmasında da çıxış edirdi.

Kiko
1992-ci ilin olimpiya çempionu. 90-cı illərdə həm "Atletiko"nun, həm də İspaniya yığmasının hücumçusu. Fernando Torresin və Daniel Gizanın məşhurlaşmış qol sevinci məhz Kikodan ilhamlanmışdı. O, madridlilərin Simeone dövrünə qədər qazandığı son çempionluğun (1996) da memarlarından biri idi.

Xose Mari
Daha çox "Milan" və "Vilyarreal"dakı oyunu ilə xatırlanan hücumçu da həmin mövsüm (hələ gənc və perspektivli) "Atletiko"nun uğurları üçün çalışırdı.

Xuan Karlos Valeron
"Deportivo"nun əfsanəsi, bir müddət İspaniya yığmasının da əsas pleymeykeri, maestro! Məhz onun gəlişindən sonra "Depor"a çempionluq yaşatmış "Sehrbaz" ləqəbli Calminyanın ehtiyat oyunçular skamyasındakı günləri başlamışdı.

Ruben Baraxa
Onun 2000-ci illərdə Albelda ilə "Valensiya"da formalaşdırdığı orta xətt tandemi kluba iki dəfə İspaniya çempionluğu qazandırmışdı. Onlar bir müddət yığmada da əsas söz sahibi idilər. Təbii ki, Baraxa üçün 2001-ci ildə məğlubiyyətlə bitən ÇL finalını da xatırlamağa dəyər. Hazırda "yarasalar"ın baş məşqçisi olan Ruben klubun əfsanələrindən sayılır.

Xuan Kapdevilya
Dünya və Avropa çempionu 2004-cü ildə "Depor"la ÇL-də finalın biraddımlığında dayanmışdı. "EuroDepor" ləqəbli komandanın vacib parçalarından olmuş Kapdevilya sonradan Avropada yaxşı çıxış etmiş daha bir İspaniya klubunun - "Vilyarreal"ın əsas oyunçularından sayılırdı. Yığmadakı uğurlarını isə hamınız gözəl xatırlayırsız.

Radek Beybl
Çexiya yığmasının sabiq baş məşqçisi Duşan Uhrin deyirdi ki, yığmanın AÇ-96-da finala qədər irəliləməsində ən böyük pay sahiblərindən biri gözə az görünsə də, məhz sözügedən dayaq yarımmüdafiəçisidi. Məhz onun müdafiənin önündə apardığı "təmizlik” işləri sayəsində Nedved, Poborski, Berger, Kuka, Şmitser və başqaları ön xətdə parlayırdılar.

Santyaqo Solari
"River Pleyt"in yetirməsi olan Solari sonradan "qalaktikos"un da bir parçasına çevriləcək. "İnter"in heyətində A seriyasında qalib olmuş yarımmüdafiəçi həm Libertadores Kubokunu (1996), həm də ÇL-i (2002) qazanmış azsaylı futbolçulardandı.

Karlos Qamarra
İki əsrin qovuşduğu dönəmdə Qamarra Arse, Ayala və Çilavertlə birlikdə Paraqvay yığmasında dünya futbolunun ən etibarlı arxa xətlərindən birini formalaşdırmışdı. İnanmırsızsa, Fransa (1998) və Almaniyadan (2002) soruşun. Mərkəz müdafiəçisi olmasına baxmayaraq, DÇ-98-də bir dəfə də qaydanı pozmamış Qamarranın yığmada komanda yoldaşı Selso Ayala da həmin mövsüm "Atletiko"nun uğurları üçün çalışırdı.

Xose Şamot
Argentina yığmasının heyətində üç dünya çempionatında iştirak etmiş müdafiəçi üçün Nesta "gəncliyimdə "Latsio"da ondan çox şey götürmüşəm" deyirdi. Nesta mənim gördüyüm ən yaxşı mərkəz müdafiəçilərinin başında gəlir. Onun bu sözləri deməsi kifayətdi.

Xose Molina
Daha bir "Depor" əfsanəsi. Yığmada da yer alan Molina 1996-cı ildə "Atletiko" ilə ölkə çempionluğu yaşamışdı.

Santi və Karlos Agilera
Bu arxa xətt oyunçuları birlikdə "Atletiko"da 600-dən çox oyun keçirib. Santi mərkəz müdafiəçisi idi. Agilera isə tək Madrid təmsilçisində yox, İspaniya yığmasında da (DÇ-98) müdafiənin sağ cinahında çıxış edirdi.

ELZAMİN HACIYEV