İspaniya çempionatının 35-ci turunda ''Atletiko'' ''Real Sosyedad''ı qəbul etdi.

"Football-plus.az" xəbər verir ki, bu mövsüm La Liqada ən çox oyunda qapısını toxunulmaz saxlayan iki kollektivin mübarizəsində sürpriz nəticə qeydə alındı.

''Atletiko''nun 4:0 hesabı ilə parlaq qələbə qazandığı oyun Aleksander Sörlotun benefisinə çevrildi. Norveçli forvard turnirin tarixinə düşən bir performans ortaya qoydu. 29 yaşlı futbolçu 7, 10 və 11-ci dəqiqələrdə vurduğu qollarla het-trik etdi. Bu 3 qol cəmi 3 dəqiqə 57 saniyə aralığına sığışdı. Turnirin tarixində buna qədər ilk 11 dəqiqədə 3 qol vuran futbolçu olmamışdı!

Əvvəlki rekord 15-ci dəqiqə idi. Bunu 1941-ci ildə ''Valensiya''nın heyətində Mundo Suares və 1929-da ''Barselona''nın heyətində Karles Bestit bacarmışdı. ''Atletiko''nun tarixində isə buna qədər het-trik ən yaxşı halda ilk 31 dəqiqəyə təsadüf etmişdi və bu, uzaq 1946-cı ildə baş vermişdi. Maraqlıdı ki, Sörlot bu qollarla kifayətlənmədi və yarım saatın tamamında həm komandasının, həm də özünün 4-cü qolunu da vurdu. Ancaq ilk 30 dəqiqəyə 4 qol La Liqanın rekordu deyil. Artıq yuxarıda adını çəkdiyimiz ''Valensiya''lı Mundo Suares 4 qolu 20 dəqiqəyə sığışdırmışdı. Daha bir diqqətçəkən məqam odu ki, Sörlot son bir ildə La Liqa kimi çətin bir turnirdə artıq ikinci dəfə poker etdi! O, ötən il mayın 19-da ''Vilyarreal''ın heyətində ''Real'' ilə qarşılaşmada (4:4) da 4 qol vurmuşdu.

Xatırladaq ki, daha öncə 2019/20-də ''Trabzonspor''un heyətində vurduğu 24 qolla Türkiyə çempionatının bombardiri olmuş təcrübəli futbolçu ''Atletiko''da ilk mövsümünü keçirir. O, madridlilərin heyətində 47 rəsmi oyuna 21 qol vurub.