Respublikanın tanınan futbol hakimi Orucəli Durmuşov 80 yaşını tamamlayıb. Onu bu münasibətlə təbrik edir, uzun ömür və cansağlığı arzulayırıq.

Orucəli Durmuşov... Bu ad-soyad SSRİ vaxtı və müstəqilliyin ilk illərində futbol turnirlərini yaxından izləyən hər kəsə tanışdı. 1945-ci il avqustun 29-da Əmircan kəndində dünyay gələn Orucəli müəllimin bütün həyatı futbolla bağlıdı. Futbol oynamağa “Neftçi”nin uşaq və gənclər komandasında başlayıb, Bakının “Neft daşları”, “Kompressor”, Voronejin “Trud” (indiki “Fakel”), Dərbəndin “Üzümçü” komandalarında oynayıb.

Orucəli Durmuşov nadir futbol adamlarındandı ki, bu sahə ilə bağlı ən müxtəlif peşələrdə özünü göstərib. Onun 1978-83-cü illərdə çalışdırdığı “Toxucu” respublika çempionatında həm qalib olub, həm də mükafatçı yerlər tutub. Durmuşovu ən çox cəlb edən isə hakimlik olub. Bu da təsadüfi deyil. Orucəli müəllim gündəlik həyatda olduğu kimi, yaşıl meydanda da ədaləti təmin etməyə çalışıb. 1975-ci ildə hakimliyə başlayan yubilyar Azərbaycan çempionatı və kuboku çərçivəsində 289, SSRİ çempionatının müxtəlif dəstələri və kuboku çərçivəsində 177 oyun idarə edib, həmçinin 18 beynəlxalq oyunda iş başında olub. SSRİ və Azərbaycan çempionatlarında üst-üstə 484 oyun idarə edib ki, bu da hər hakimə nəsib olan uğur deyil.

Orucəli müəllim usta hakim olmaqla yanaşı, həm də bacarıqlı təşkilatçı və pedaqoqdu. O, 1995-2014 aralığında hakimlər və hakim-inspektorlar komitəsinin üzvü kimi 108 oyuna təyinat alıb. Həmin komitədə sədr müavini, 1997-99 aralığında AFFA-da aparıcı mütəxəssis, 2000-04 aralığında Həvəskarlar Futbol Federasiyasının baş katibi kimi çalışıb. 2005-07 aralığında isə Avropa Tələbə Futbol Federasiyasının vitse-prezidenti olub, ölkəmizdə tələbə futbolunun inkişafında, bu sahədə beynəlxalq əlaqələrin qurulmasında böyük rol oynayıb.

Durmuşovun pedaqoji bacarığından da söz açmağa dəyər. Beynəlxaq dərəcəli hakimlərdən Tahir Süleymanov, Zöhrab Qədiyev, Emin İsgəndərov, Kərim Ağayev, Rufulla Kərimov, Elman Musayev, respublika dərəcəli hakimlərdən Əhmədağa Cabbarov, Gülağa Cabbarov, Vaqif Hüseynov, Elşən Durmuşov və Əvəz Şıxıyevin hazırlanmasında, inkişafında əməyini əsirgəməyib.

Orucəli müəllim indi ömrünün ahıl çağlarını yaşasa da, yenə də futboldan uzaq deyil. İmkan tapan kimi “Azərsun Arena”ya – “Qarabağ”ın oyunlarını izləməyə yollanır. Onu başa düşmək olar; axı futbol sevgisi adamı heç vaxt tərk etmir!