“Beynəlxalq dərəcəli hakimlərimizi görən gözü yox idi”
SSRİ futbolunda məşhur hakim Nikolay Latışevin köməkçisi kimi tanınan Sergey Belyayev "Sport-Ekspress" qəzetinin son saylarının birində dünyaca məşhur azərbaycanlı hakimlər Tofiq Bəhramovla Eldar Əzimzadə haqda diqqətimizi çəkən fikirlər söyləyib.
90 yaşlı veteran hakimin sözlərinə görə, hakimlərimiz qitəmiqyaslı yarışlara savad-bacarıqlarıyla yox, Latışevin lobbiçiliyi sayəsində təyinat alıblar. O həmçinin qeyd edib ki, Bəhramovla Əzimzadə laysmanlıqda olduqca zəif olmaqla yanaşı, karyeralarını uzatmaq üçün yaşlarını azaldıblar. Belyayevin söylədiklərinə veteran hakimimizin fikrıni öyrəndik.
Orucəli Durmuşov “Football-plus.az” saytına bunları söylədi: "Həmin dövrdə Bakıda Balayan, Koqanov, Gerasimenko, Ağacanov, Mlaçakanov, Akopov kimi "hakimlər” vardı. Hamısı Eldar Əzimzadə ilə Tofiq Bəhramovun paxıllığını çəkən və düşmənlik edənlər idi. Məhz onlar o dövrdə şayiə yaydılar ki, hər iki hakimimiz yaşını azaldıb. Dərhal yoxlanış başladı, nəticədə bəlli oldu ki, söylənilənlərin heç bir əsası yoxdu. 1974-cü ildən başlayaraq, hakimliklə bağlı fərqli vəzifələrdə çalışmışam. O vaxt Azərbaycan hakimlik camiəsini yuxarıda adı çəkilənlərdən təmizlədik. Yalnız Aleksey Balayana gücüm çatmadı. Belə ki, o referilikdən başqa, həm də "Bakı" qəzetində jurnalist idi və çoxlu havadarları vardı. Təəssüf ki, ona qanad verənlər arasında özümüzkülər də vardı. Balayan bir dəfə də olsun, beynəlxalq yarışlara təyinat almayıb, ancaq SSRİ-nin güclülər dəstəsində 34 oyun idarə edib. Ona görə də bizim beynəlxalq dərəcəli hakimlərimizi görən gözü yox idi. Məhz onun kimilərin yaydığı şayiələr üzündən bəzi rus şovinistlər bizi ləkələməyə çalışıb. Təbii ki, rusların hamısı şovinist, qaraguruhçu deyildi. Yetərincə ədalətli rus hakimlər də çox idi. Elə Nikolay Latışevin özü bəs edir. O, son dərəcə dürüst, səmimi və ədalətli insan idi. Həmişə özünü yaxşı tərəfdən göstərənləri irəli çəkirdi”.
ABDULLA İSMAYILOĞLU
Digər xəbərlər
