"Tofiq Bəhramov nəinki SSRİ-də, hətta dünya futbolu tarixində imzasını atmış böyük hakimdi. Nikolay Latışevdən sonra dünya çempionatına təyinat alan 2-ci, avrokuboklarda isə ədaləti qoruyan ilk hakimdi. Tofiq müəllim SSRİ-də 13 dəfə 10 yaxşı hakimlər sırasında yer alıb.

Eldar Əzimzadə 3 dəfə SSRİ-nin ən yaxşı hakimi adına layiq görülübsə, 9 dəfə də ən yaxşı 7 hakimi sırasında yer alıb. 1980-ci ildə keçirilən Olimpiadada Çexslovakiya - ADR matçında ədaləti qoruyub. Eldar müəllim oyunu o qədər gözəl idarə edib ki, həmin dövrdəki FİFA və BOK prezidentləri onu xüsusi medal və diplomla təltif edir. Bacarığı, savadı olmayan hakimlər bu səviyəyə qalxa bilməzdilər. O dövrdə bəzi rus hakimlər və futboldakı səlahiyyətli şəxslər şovinistliklərindən dolayı bizim irəli getməyimizi gözləri götürmürdü. Mən öz təcrübəmdə də bunun şahidi olmuşam. Çox yaxşı xatırlayıram, Olimpiya Oyunlarında məşhurlaşan Eldar Əzimzadə növbəti dəfə SSRİ-də ən yaxşı hakim adını qazananda, bir qrup rus referinin paxıllığı pik həddə çatdı. O vaxt oyunlara təyinat alan mən və Rüstəm Rəhimova qarşı da yetərincə mənəvi repressiyalar olub. Hətta nəinki bizə, qafqazlılara qarşı ayrı-seçkilik dəb halını almışdı. Yaxşı xatırlayıram, özlərini hamıdan üstün sayan bəzi rus hakimlər və onların havadarları başda Velodi Miminoşvili olmaqla gürcü və erməni hakimlərə qarşı da qərəz nümayiş etdirirdilər. Tofiq Bəhramov və Eldar Əzimzadə kimi hakimlərimiz həm referilikdə, həm də insanlıqda əllərindən heç nə gəlməyib şovinistlik edən ruslara dərs keçərdilər. Onlar futbolumuzda, tariximizdə adımız-sanımızdı".