2028-ci ildə Los Ancelesdə keçiriləcək Yay Olimpiya Oyunlarının basketbol turniri iyulun 12-də - açılış mərasimindən iki gün əvvəl start götürəcək.

Düzdü, FİBA-nın yaydığı xəbərdə məhz həmin gün kişilərin, yoxsa qadınların turnirinin başlayacağı xəbər verilməyib. İlkin təqvimdə iyulun 12-13-də üç oyunun keçirilməsi nəzərdə tutulur. Bu dəyişiklik 1/4 final oyunlarının iki gün ərzində keçirilməsinə imkan verəcək. Həmçinin heç bir oyun günün günorta çağı başlamayacaq ki, bu da oyunçuların, komandaların, azarkeşlərin və yayınçı şirkətlərin işini asanlaşdıracaq.

Bürünc medal uğrunda oyunlar iyulun 28-29-da, qızıl medal uğrunda oyunlar isə iyulun 29-30-da keçiriləcək. İyulun 30-u Olimpiadanın son günüdü. Xatırladaq ki, 2024-cü ildə keçirilən Paris Olimpiadasında həm kişilərin, həm də qadınların turniri ABŞ yığmasının qələbəsi ilə başa çatıb.