Beynəlxalq Basketbol Federasiyası (FIBA) Beynəlxalq Olimpiya Komitəsinin (BOK) tövsiyəsini nəzərə alaraq, Rusiya yığmasını gələn il Parisdə keçiriləcək Olimpiadanın ilkin təsnifat turnirinə buraxmamağa qərar verib. Bir neçə gün əvvəl bu məsələ ilə bağlı qərarın FIBA İdarə Heyətinin aprelin 28-də keçiriləcək iclasında veriləcəyi deyilirdi.

"Football-plus.az" xəbər verir ki, 40 yığmanın qatılacağı ilkin təsnifat turniri avqustun 12-20-si aralığında keçiriləcək. İlkin təsnifat turnirinin nəticələrinə görə 5 yığma gələnilki son təsnifat mərhələsinə vəsiqə qazanacaq.

Xatırladaq ki, BOK Rusiya və Belarusdan olan, fərdi idman növlərini təmsil edən idmançıların yarışlara neytral statusla buraxılmasını tövsiyə edib. Amma bir şərtlə ki, həmin atletlər Rusiyanın hazırda Ukraynada apardığı işğalçı müharibəyə hansısa şəkildə dəstək verməsin, onların Rusiya və ya Belarus ordusu, güc strukturları və təhlükəsizlik orqanları ilə əlaqəsi olmasın.