“Finiks”in və ABŞ yığmasının oyunçusu Kevin Dürant PSJ-nin minoritar səhmdarı olacaq.

Bu haqda xəbəri “L'Equipe” yayıb. Həmin qaynağın yazdığına görə, Dürant bir neçə milyon dollar müqabilində Paris klubunda pay qazanacaq. Avqustun 6-da PSJ-nin düşərgəsinə baş çəkən ulduz basketbolçu parislilərin azarkeşi və klubun sahibi Nasser Əl-Xelayfinin yaxın dostudu.

Bu arada ABŞ basketbol yığmasının baş məşqçisi Stiv Kerrin postunu tərk edə biləcəyi xəbər verilir. Həmkarımız Evan Sayderi bildirir ki, onun yerini köməkçisi Erik Spoelstra tutacaq. Kerr 2021-ci ildən bəri ABŞ yığmasının “sükanı arxasındadı”. Onun komandası bazar günü başa çatan Olimpiadanın qalibi olub. Kerr 2014-cü ildən “Qolden Steyt”ə rəhbərlik edir, Spoelstra isə 2008-ci ildən “Mayami”nin baş məşqçisidi.

Yeri gəlmişkən, Paris Olimpiadasında basketbol yarışlarını rekord sayda tamaşaçı izləyib. Beynəlxalq Basketbol Federasiyasının mətbuat xidmətinin yaydığı xəbərə görə, oyunları ümumilikdə 1 milyon 78 min 319 adam izləyib. Əvvəli rekord (1 milyon 68 min 32) 1996-cı ildə keçirilən Atlanta Olimpiadasında qeydə alınmışdı. Kişilərin turnirində hər oyunda tribunalarda orta hesabla 21711, qadınların turnirində isə 19763 tamaşaçı olub.