"İmişli" Misli premyer-liqasının 1-ci turu çərçivəsində keçirilən oyunda “Turan Tovuz”a məğlub oldu - 0:1.

Oyundan sonra nominal meydan sahiblərinin baş məşqçisi Xorxe Kaskilya jurnalistlərin suallarını cavabladı.

- Yaxşı oyun oynadıq. Əlavə dəqiqələrdə qol buraxmaq ağır haldı. Amma bu, futboldu. Birinci hissə bərabərsəviyyəli oyun oldu, komandalar bir-birini kəşf etdi. İkinci hissədə topa daha çox yiyələndik. Qol şanslarımız da oldu. Müdafiəçimizin və qapıçımızın xəsarət alması oyuna təsir etdi. Zəiflədik və qol buraxdıq. Növbəti oyunlara hazırlaşacağıq.

– Görünən odu ki, qapıçının vəziyyəti ağırdı. Sonrakı oyunlarda Hüseynəliyə güvənəcəksiz, yoxsa yeni legioner qapıçı transfer olunacaq?
– Hər iki oyunçu başdan açıq yara aldı. Həkimlərdən xəbər gözləyəcəyik. Ümid edirik ki, vəziyyətləri yaxşı olar. Başqa transfer barədə düşünmürük.

– “Turan Tovuz” adətən son saniyələrdə qol vurur. Bu gün də sizin başınıza gəldi. Bunun analizini aparmışdız?
– Əlbəttə, analiz etmişdik. Aqressiv oyuna və uzun ötürmələrə üstünlük verirlər. Oyunun sonları olduğundan futbolçular yorğun idi.

– Çempionatın özəlliyi nədi?
– Çempionata gəlməmişdən əvvəl baxmışdım. Yüksək səviyyədədi. 4-5 səviyyəli komanda var. Yüksək səviyyəli legionerlər var.

– Azərbaycanı və çempionatı nə dərəcədə tanıyırsız? Çempionatdan baş çıxara biləcəksiz?
– Bura gəlməyimin səbəbi nəticə göstərməkdi. İkinci hissədə taktiki cəhətdən inkişaf etdik. Komandanın fiziki və texniki cəhətləri normaldı. Çalışacağıq ki, elitada yerimizi qoruyaq.

– Siz kluba gətiriləndə xeyli tənqidlər olmuşdu. Bundan xəbərdardız? Necə reaksiya vermisiz?
– Bu barədə çox məlumatım yoxdu. Heç maraqlanmıram da. Komandanın güclənməsi üçün əlimdən gələni edəcəm. “Turan Tovuz” çempionluq uğrunda mübarizə aparan komandadı. İkinci hissədə yaxşı oynadıq. Bu o deməkdi ki, yaxşı işləyirəm.

– Klub İmişlini təmsil etsə də, gah Bakıda, gah da Sumqayıtda məskunlaşır. Ev oyunlarını da Şamaxıda keçirir. Bu şərtlər altında oynamağa özünüz də razısız? Əvvəl belə halla rastlaşmısız?
– Bu problemlər olsa da, əsas məqsəd komandanın üzərində işləməkdi. İstərdik ki, İmişlidə oynayaq. Bu işlərin həlli ilə rəhbərlik məşğul olur. Bizim işimiz komandanın strukturunu qurmaqdı. Birinci dəfədi belə halla rastlaşıram. Azarkeşlərimizə təşəkkür edirəm ki, bu qədər yol gəlib, bizə dəstək oldular. “Neftçi” ilə oyunda onları sevindirməyə çalışacağıq.

MÜZƏFFƏR QULUZADƏ