“Qızıl top” mövzusunda müzakirələr qızışır - Hakimi də özünü bu mükafata layiq görür
Hər il olduğu kimi, bu il də “Qızıl top” mövzusunda çoxlu müzakirələr var.
"Football-plus.az" xəbər verir ki, “Frans Futbol” 30 namizədin adını açıqlayandan bəri mükafata bu il kimin daha çox layiq olması ilə bağlı söhbətlər gündəmdən düşmür. Qalib sentyabrın 22-də bəlli olacaq. Bolqarıstan futbolunun əfsanəsi Xristo Stoiçkov maraqlı açıqlama verib. 1994-cü ildə bu mükafata sahib çıxmış Stoiçkovun sözündən belə qənaətə gəlmək olar ki, bu il qalibə “Qızıl top”u məhz o təqdim edəcək:
“Mənim üçün iki əsas namizəd var: biri Yamal, digəri Dembele. Fikrimcə, Çempionlar Liqasında qeydə alınan nəticələr səsvermədə mühüm rol oynayacaq. Gözləyək görək, mən mükafatı onlardan hansına təqdim edəcəm. Şəxsən mən Yamalın qalib gəlməsini istəyirəm. Mükafatı ona vermək arzusundayam. Amma digər tərəfdən, bu mükafat “Frans Futbol” tərəfindən təqdim olunur. Dembele isə fransalıdı”.
Maraqlıdı ki, Stoiçkovdan fərqli “Barsa”nın tarixində iz buraxmış digər əfsanə Ronald Kuman əsas namizədlər arasında Yamalı qeyd etməyib. Niderlandlı futbol adamı “De Oranyezomer” adlı şouda verdiyi açıqlamada bunları deyib:
“İlk “3-lüy”ə niderlandlılardan ya Van Diyki, ya da Dyumfrisi salardım. Digər namizədlərim isə Dembele və ya PSJ-dən bir başqa futbolçu, məsələn, Vitinya olardı. Pedri ilə Rafinya da var. Namizədlər çoxdu. Yamal? O heç nə qazanmayıb”.
Bu arada PSJ-nin liderlərindən olan Əşrəf Hakimi də müzakirələrə qoşularaq özünü bu mükafata layiq görüb. Mərakeşli ulduz fikrini belə əsaslandırmağa çalışıb:
“İnsanlar “Qızıl top”la bağlı müzakirələrdə tez-tez adımı çəkirlər. Əslində bu haqda düşünmürdüm. Amma indi görürəm ki, mənim də onu qazanmaq şansım var. Çünki həqiqətən də tarixi mövsüm keçirdim. ÇL-də bir mövsümdə həm 1/4 finalda, həm yarımfinalda, həm də finalda qol vuran futbolçuların sayı o qədər də çox deyil. Özü də bəziləri mənim hücumameyilli futbolçu olduğumu düşünür. Amma mən müdafiəçiyəm və ilk növbədə müdafiə haqda düşünməliyəm. Hərçənd mənim ötən mövsümdəki statistikam adi müdafiəçinin göstəricilərindən çox fərqlənir. Fikrimcə, belə göstəricilərə nail olan müdafiəçi hücumçudan daha çox alqışa layiqdi”.
“Qızıl top”un rəsmi “instaqram” səhifəsinin dünənki yanlış paylaşımı diqqəti çəkib. Səhifədə tez-tez bu mükafatın sabiq qalibləri yad olunur. Dünən, yəni avqustun 11-də həmin səhifə 2018-ci ildə “Qızıl top”u qazanmış Luka Modriçin şəklini paylaşaraq onun doğum gününü təbrik edib. İlk baxışdan burda qeyri-adi nəsə yoxdu. Amma problem ondadı ki, ünlü xorvatiyalı futbolçunun doğum tarixi 9 sentyabrdı! Modriç ora “ad günüm gələn ay olsa da, istənilən halda təşəkkür edirəm” şərhini yazıb. Amma çox keçmədən paylaşım silinib.
Digər xəbərlər
