Son günlərdə Messi ilə bağlı yayılan bir maraqlı xəbəri də diqqətinizə çatdıraq.

Şayiələrə inansaq, argentinalı superulduza “Super Qızıl top” mükafatı təqdim oluna bilər. Bu mükafat haqda, yəqin ki, bir çoxlarının xəbəri yoxdu. Çünki indiyə qədər onu yalnız bir futbolçuya təqdim ediblər. 1989-cu ildə “Frans Futbol” son üç 10 illiyə, yəni son 30 ilə damğa vurmuş futboçu üçün “Super Qızıl top” mükafatı təsis etdi. Görünüşcə o, adi “Qızıl top”dan iridi və ən əsası alt hissəsində bir neçə kiçik “Qızıl top” təsvir olunub. 33 il öncə Alfredo Di Stefano Yohan Kroyff və Mişel Platinini qabaqlayaraq bu mükafata sahib çıxmışdı. Özü də səsvermə “Qızıl top”un bütün qalibləri arasında aparılmışdı!

Əfsanəvi Di Stefano ötən əsrin ortalarında iki dəfə “Qızıl top”un qalibi olub, eləcə də “Real”ın heyətində 5-i ÇK olmaqla saysız-hesabsız titullar qazanıb. 2014-də dünyasını dəyişən Di Stefano Madrid nəhəngində ümumilikdə 396 oyuna 308 qol vurub. O vaxtdan bəri bu mükafat haqda danışan yox idi. Amma çoxlarının fikrincə, karyerasıboyu 1025 oyuna 799 qol, 388 məhsuldar ötürməlik performans sərgiləyən Messi həm məhsuldarlıq, həm titul sayı baxımından Di Stefanonu keçdiyi üçün o da “Super Qızıl top”a layiqdi. Hələ ki “Frans Futbol” nümayəndələrinin mövzu ilə bağlı mövqeyi bəlli olmasa da, Leo üçün bu mükafatı tələb edənlərin sayı gündən-günə artır.