"Bu gün məğlub olsaydıq da, məyus olmayacaqdım" - Rəşad Sadıqov

"Zirə" Misli premyer-liqasının 8-ci turunda səfərdə "Kəpəz"lə 1:1 hesablı heç-heçə edib.

"Football-plus.az" xəbər verir ki, qonaqların baş məşqçisi Rəşad Sadıqov matçdan sonra keçirilən mətbuat konfransında jurnalistlərin suallarını cavablandırıb.

- Olduqca maraqlı oyun alındı. İlk hissəfə meydanda taktiki savaş gedirdi. Düşünürəm ki, iki komanda da bu gün 1 xal qazandı. İkinci hissədəki oyuna görə futbolçularıma təşəkkür edirəm. Rəqib qapıçının qurtatışları qırılma nöqtəsi idi. Bu cür atmosferdə oynamaq çətindi. Rəqib həqiqətən də 12 oyunçu ilə oynayırdı. Qoldan sonra verdiyimiz reaksiya məni məmnun etdi. Amma bu, qələbə qazanmağa kifayət etmədi.

- Heyətdə zədəli futbolçular çoxdu. Bu gün meydanda 5 yerli oyunçu var idi. Düşünmürsüz ki, keyfiyyət öz sözünü dedi?
- Bəli, ciddi itkilərimiz var. Ərən Aydın, İssa Cibrilla zədədən yeni qayıdıb. Əlimizdə olan futbolçular risk altındadır. Problemləri ciddidi. Əlimizdən gələni edirik. Düşünürəm ki, bu perioddan çıxacağıq.

- Gəncə şəhər stadionundakı atmosferlə bağlı fikirləriniz necədi?
- Həqiqətən azarkeşlər möhtəşəm idi. Burada oynamaq çox yaxşıdı. Sevinirəm ki, Azərbaycanda belə stadion var. Bu gün məğlub olsaydıq da, məyus olmayacaqdım.

- Giorgi Papunaşvilinin az oynamasının səbəbi nədi?
- Yeni seleksiyalardan sonra komandada rəqabət artıb. "Şamaxı" və "Kəpəz"lə matçda Papunaşvilini əsas heyətdə planlaşdırırdıq, amma xəstələndi. 10 gün yataqdan qalxa bilmədi. Bizimlə cəmi bir məşqə çıxmışdı.

- Komanda mövsümə 3 qələbə ilə başladı, amma növbəti 5 turda qalibiyyət yoxdu. Sizcə, nə çatmır?
- Bunun üzərində işləyirik. Hər şeyi mətbuat konfransında danışmaq olmur. Öz aramızda müzakirə edirik. Son iki matçda futbolçularda həyəcan hiss olunur. Bu, yüz faizli qol epizodlarında özünü büruzə verir. Üzərimizdə müəyyən təzyiq var. Hər il belə period olur. Əlimizdən gələni edirik ki, qələbə qazanaq. İddialı olmaqdan ötrü uğurlu olmaq da şərtdi. Bəxt deməyim, həmin sözü xoşlamıram. Ümid edirəm ki, qarşıdakı turlarda düzələr.