2025-ci il üçün ''Golden Boy'' mükafatına namizəd olan 100 futbolçunun adı açıqlanıb.

"Football-plus.az" xəbər verir ki, bu mükafat gənclər arasında ''Qızıl top''un analoqu hesab olunur. ''Golden boy'' hər il Avropada yaşı 21-ə çatmayan futbolçuya təqdim olunur.

Ötən ilin qalibi ''Barselona''lı Lamin Yamal bu dəfəki reytinq siyahısının başında yer alsa da, daha öncə titulu qazandığı üçün onun adı yalnız simvolik olaraq bura salınıb. Yamalın ardından ikinci pillədə ''Barsa''nın digər gənc ulduzu Pau Kubarsi qərarlaşıb. Məhz bu futbolçu bu il bu mükafatı qazanmağa əsas namizəd hesab olunur. Onun əsas rəqibi isə 3-cü pillədə qərarlaşan PSJ-li Dezire Duedi.

Qeyd edək ki, Kubarsi mükafatın sahibinə çevrilsə, son 5 ildə 4-cü dəfə ''Golden Boy'' ''Barselona''lı futbolçuya qismət olacaq. 2021-də Pedri, 2022-də Qavi, ötən il isə artıq qeyd etdiyimiz kimi Yamal bu mükafata sahib çıxmışdı. Türkiyəli futbolçulara gəlincə, açıqlanan 100 nəfərlik siyahıda 6 türkiyəli ismə rast gəlmək mümkündü. Onlardan yalnız biri - ''Yuventus''lu Kənan Yıldız ilk ''10-luq''da, konkret desək, 7-ci pillədə qərarlaşıb. ''Real''ın 20 yaşlı ulduzu Arda Gülər 13-cü, ''Nürnberq''də ulduzu parladıqdan sonra ötən yay ''Ayntraxt''a transfer olunan Can Uzun 67-ci, bu yaxınlarda ''Kasımpaşa''dan ''Aston Villa''ya transfer olunan Yasin Özcan 79-cu, Joze Mourinyonun ''Fənərbaxça''dakı kəşfi Yusuf Akçiçək 91-ci və ''Beşiktaş''ın üzvü Semih Kılıçsoy 94-cü pillədə özünə yer edib. Sonda bu il bu mükafatı qazanmağa əsas namizəd sayılan futbolçuların ilk ''10-luğ''unu təqdim edirik.

1. Lamin Yamal (Barselona, simvolik)
2. Pau Kubarsi (Barselona)
3. Dezire Due (PSJ)
4. Mayls Lüis-Skelli (Arsenal)
5. Uorren Zair-Emeri (PSJ)
6. Din Höysen (Real)
7. Kənan Yıldız (Yuventus)
8. Etan Nvaneri (Arsenal)
9. Jeovani Kenda (Sportinq)
10. Yorrel Hato (Ayaks)