Heyətini Orkun Kökçü, David Yurasek və Temmi Abraham ilə gücləndirən “Beşiktaş” bu yayın növbəti transferini reallaşdırmaq üzrədi.

"Football-plus.az" xəbər ki, “ağ-qaralar” “Napoli”nin isveçli yarımmüdafiəçisi Yens Kayuste ilə razılıq əldə edib.

25 yaşlı futbolçuya başqa klublardan da ciddi maraq var idi. O, “Kristal Pelas”, “Bernli” və “Sevilya”dan da təkliflər almışdı. Amma Türkiyə mətbuatının yazdığına inansaq, bu futbolçu baş məşqçi Ole Qunnar Sulşer ilə söhbət edəndən və onun planları ilə tanış olandan sonra İstanbul nəhənginə gəlməyə razılıq verib. Artıq neapollularla da razılıq əldə olunub.

Kayustenin Türkiyəyə gələrək tibbi müayinədən keçəcəyi, rəsmi müqaviləyə imza atacağı və daha sonra Avstriyada toplanışda olan komandanın düşərgəsinə yollanacağı gözlənilir.

Keçidin detallarına gəlincə, bu futbolçu Türkiyədə ilk mövsümü icarə əsasında keçirəcək. “Qartal” Neapol klubuna icarə haqqı kimi 1,5 milyon avro ödəyəcək. Ancaq “Beşiktaş” şərtə bağlı olaraq onu daimi əsasda transfer etmək hüququnu da ələ keçirib. Kayuste 15 rəsmi oyunda forma geyəcəyi təqdirdə bu maddə avtomatik qüvvəyə minəcək. Belədə Kayuste ilə üçillik müqavilə imzalanacaq və “Napoli”yə əlavə 6,5 milyon avro ödəniləcək.

Daha öncə “Midtüllann” və “Reyms”də forma geyən Kayuste 2023-cü ildən “Napoli”yə məxsusdu. Ötən mövsümü premyer-liqa təmsilçisi “İpsviç”də keçirən və 33 rəsmi oyunda hesabına 1 qol, 1 məhsuldar ötürmə yazan Kayustenin transfer dəyəri 12 milyon avrodu. Əsasən dayaq yarımmüdafiəçisi kimi oynayan bu futbolçu İsveç yığmasında indiyə qədər 25 qarşılaşmada forma geyib.