''Beşiktaş''ın sağ müdafiəçi lənəti davam edir
''Beşiktaş''ın bu yay sağ müdafiəçi transferi ilə bağlı yaşadığı ağlasığmaz lənət davam edir.
"Football-plus.az" xəbər verir ki, İstanbul nəhəngi heç cür bu mövqeni gücləndirə bilmir.
''Qartal'' bu dəfə diqqətini Emerson Royala yönəltmişdi. Bir çox mənbələr ''Milan''la braziliyalı futbolçunun birillik icarəsi ilə bağlı razılıq əldə olunduğunu yazmışdı. ''Ağ-qaralar'' 25 yaşlı futbolçunu 10 milyon avroya daimi əsasda transfer edə bilmək hüququnu da ələ keçirmişdilər. Amma sonradan vəziyyət dəyişməyə başladı. Tərəflərin heç də bütün məsələlərdə anlaşa bilmədiyi məlum oldu.
Bunu ''TRT Spor''a açıqlamasında başqan Sərdal Adalı da təsdiqlədi:
''Emersonla ortada heç bir anlaşma yoxdu. Menecerlərlə əlbir olan bəzi sosial şəbəkə hesablarının oyunlarına gəlməyəcəyik. Artıq ''Beşiktaş''ın yaxasından düşsünlər. Klubumuz üçün ən doğru variantı seçəcəyik''.
Bu açıqlamadan dərhal sonra məlum oldu ki, ''Flamenqo'' Emersonu özünə çəkmək istəyir. ''Beşiktaş'' rəsmiləri futbolçunun paralel olaraq öz həmyerliləri ilə danışıqlar apardığını bilən kimi Emersondan vaz keçdilər. Belə olan halda ''Flamenqo''nun işi bir qədər də asanlaşdı və onlar arasında anlaşma əldə olundu. Daha öncə ''Atletiko Mineyro'', ''Betis'', ''Barselona'' və ''Tottenhem''də forma geymiş Emerson ötən mövsüm ''Milan''da 26 rəsmi oyunda forma geymişdi. Bununla da ''Beşiktaş''ın bu yay 3-cü dəfə sağ müdafiəçi almaq planı baş tutmadı.
Emersondan öncə müxtəlif səbəblər üzündən Brayt Osayi-Samuel və Kayl Uoker-Pitersin transferi son anda baş tutmamışdı.
