''Qalatasaray'' bu yayın 4-cü yoxlama matçını keçirib. İstanbul nəhəngi bu dəfə doğma ''Rams Park''da Liqa-1 təmsilçisi ''Strasbur'' ilə qarşılaşıb.

"Football-plus.az" xəbər verir ki, Okan Buruk meydana bu ''11-liy''i buraxıb: Günay Güvənç, Şallai, Əbdülkərim Bardakcı, Sançes, Ərən Elmalı, Yakobs, Torreyra, Lemina, Sara, Ahmed Kutucu, Barış Alpər Yılmaz.

Fasilədə və ikinci hissənin gedişində bu futbolçular meydana çıxıb: Kön, Kaan Ayhan, Arda Ünyay, Frankovski, Berkan Kutlu, Yelert, Metehan Baltacı, Yusuf Dəmir, Sane. 76-cı dəqiqədə Şallainin yerinə oyuna daxil olan yeni transfer Sane ilk dəfə ''sarı-qırmızılar''ın heyətində meydana çıxıb.

Fanatların böyük maraq göstərdiyi qarşılaşma gözlənildiyi kimi Türkiyə çempionunun üstünlüyü ilə keçdi. Artıq 5-ci dəqiqədə künc zərbəsi zamanı Şallai uzaq məsafədən baxımlı qolla hesabı açdı. Növbəti qol ikinci hissənin əvvəllərində yenə də künc zərbəsindən vuruldu. 50-ci dəqiqədə Barış Alpər Yılmaz önünə düşən topu başla tora göndərdi.

Barış 69-cu dəqiqədə daha bir dəfə səhnəyə çıxdı. Bu dəfə daha çətin vəziyyətdə olmasına baxmayaraq o, hava mübarizəsindən qalib ayrılaraq fərqi 3 topa yüksəltdi. Düzdü, ''Strasbur'' qollardan birinin əvəzini çıxa bildi və 81-ci dəqiqədə Lukoviç fərqləndi. Amma fransızların bundan artığına gücü çatmadı.

Beləliklə, ''Qalatasaray'' bu yay 4-cü yoxlama oyunundan da qələbə ilə ayrıldı. Komanda daha öncə ''Ümraniyəspor''u 5:2, ''Admira''nı 2:1 və ''Kalyari''ni 3:1 məğlub etmişdi.

''Cim-Bom'' avqustun 2-də daha bir dəfə fanatları önünə çıxacaq. Həmin gün ''Rams Park''a ''Latsio'' qonaq gələcək.