Türkiyə çempionatında həftəiçi 3-cü turdan təxirə salınan oyunlar keçirildi.

Sentyabrın 17-də “Qalatasaray” sabiq kapitanı Səlcuk İnanın çalışdırdığı “Qaziantep”i qəbul etdi. Meydan sahiblərində İkardi ilə Ziyeş zədə, Osimhen, Şallai və Yakobs isə reqlament üzündən oyunu buraxırdı. Çünki bu futbolçular 3-cü tur oynanılarkən hələ transfer edilməmişdi. Belədə Berkan Kutlu müdafiənin solunda şans qazandısa, Batşuayi də, nəhayət, superliqada ilk dəfə start heyətində meydana çıxdı. Gözlənildiyi kimi, oyun meydan sahiblərinin asan qələbəsi ilə yekunlaşdı. Barış Alpər artıq 11-ci dəqiqədə hesabı açmaqla karyerasında ilk dəfə ardıcıl 4-cü superliqa oyununda qol vurdu. Hələ fasiləyə qədər Yunus Akgün komandasının üstünlüyünü artırdısa, 2-ci hissədə Batşuayi də fərqlənməyi bacardı. Son anlarda Furkan Soyalp Musleranın irəlidə olduğunu görərək az qala meydanın mərkəzindən mükəmməl bir qol vurdu. Amma bu qol qonaqlar üçün təsəllidən başqa bir şey olmadı. Okan Buruk klub tarixində superliqada mövsümə ardıcıl 5 qələbə ilə başlayan 2-ci yerli mütəxəssis oldu. Daha öncə bunu 1998/99-da Fatih Terim bacarmışdı. 2009/10 və 1994/95-də isə “Aslan” belə startı uyğun olaraq niderlandlı Frank Raykaard və almaniyalı Raynhard Zaftiqin başçılığı altında reallaşdırmışdı.

“İstanbul BŞ” üçün təxirə salınmış oyun uğursuz alındı. Samsuna səfər edən Çağdaş Atanın komandası fasilədən sonra buraxdığı iki qolla məğlub oldu. Bununla da başakşəhərlilərin məğlubiyyətsiz seriyası qırıldı. Komanda cari mövsüm buna qədər keçirdiyi 10 rəsmi oyundan 8 qələbə, 2 heç-heçə ilə ayrılmışdı. “Trabzonspor” isə srağagün Burak Yılmazın çalışdırdığı “Kayserispor”u qəbul etdi. Hər kəs qaradənizlilərin, nəhayət, mövsümdə ilk qələbəni bayram edəcəyini düşünürdü. Amma heç də belə olmadı. Problemlər məngənəsində boğulan Kayseri təmsilçisi Trabzonu fəth etməyə çox yaxın idi. Uğurcan Çakır artıq 10-cu dəqiqədə Attamahın penaltisini dəf edərək böyük alqış qazansa da, cəmi 2 dəqiqə sonra Hasan Əli Kaldırımın qoluna mane ola bilmədi. Maraqlıdı ki, təcrübəli futbolçu təxminən 5,5 illik fasilədən sonra superliqada ilk qolunu vurdu. O, sonuncu dəfə 2019-un aprelində “Fənərbaxça”nın heyətində “Ankaragücü”nün qapısına yol tapmışdı. İkinci hissənin ortalarında Boa Mortenin qolu ilə “bordo-mavililər”in vəziyyəti bir qədər də qəlizləşdi. Şenol Günəş əvəzetmələrlə oyunun axarını dəyişə bildi. Sonradan meydana çıxan isimlərdən olan Umut Bozok komandasının hücumunu gücləndirərək qollardan birinin əvəzini çıxdı. Yekun nəticəni isə əsas vaxta artırılan 8-ci dəqiqədə hücuma qoşulan mərkəz müdafiəçisi Densvil müəyyənləşdirdi. Oyunun axarını nəzərə alsaq, meydan sahibləri üçün 1 xal pis nəticə sayılmamalıdı. Amma təbii ki, trabzonlu fanatlar qələbəyə köklənmişdilər. “Trabzonspor” superliqada keçirdiyi 4-cü oyunu da bərabərliklə başa vurdu. Klub tarixində daha öncə belə hal yalnız bir dəfə - 2014/15-də yaşanmışdı.

3-cü turdan təxirə salınan oyunlar
Qalatasaray – Qaziantep 3:1
Barış Alpər Yılmaz, 11. Yunus Agün, 26. Batşuayi, 76 – Furkan Soyalp, 81.
Qalatasaray: Muslera, Kaan Ayhan (Yelert, 77), Əbdülkərim Bardakcı, Sançes (Nelsson, 77), Berkan Kutlu, Torreyra, Sara, Barış Alpər Yılmaz (Efe Akman, 82), Mertens (Kərəm Dəmirbay, 72), Yunus Akgün (Yusuf Dəmir, 72), Batşuayi.

Samsunspor – İstanbul BŞ 2:0
Muandilmaci, 65. Van Dronqelen, 72.
İstanbul BŞ: Muhammed Şengezər, Duarte (Kemen, 51), Ba, Opoku, Lima, Onur Ərgün (Calo, 75), Berkay Özcan (Berat Özdəmir, 75), Krespo (Fiqeyredo, 69), Dəniz Türüc, Davidson (Sərdar Gürlər, 69), Pyontek.

Trabzonspor – Kayserispor 2:2
Umut Bozok, 89. Densvil, 90+8 – Hasan Əli Kaldırım, 12. Boa Morte, 63.
Trabzonspor: Uğurcan Çakır, Maleyro, Saviç (Ozan Tufan, 14), Densvil, Ərən Elmalı, Mendi, Okay Yokuşlu (Lundstram, 64), Orşiç (Poyraz Yıldırım, 46), Bardi (Nvakaeme, 46), Cihan Çanak, Draquş (Umut Bozok, 81).
1. Qalatasaray – 15, 2. Fənərbaxça – 13, 3. Beşiktaş – 10 (4), 4. İstanbul BŞ – 10, 5-6. Eyüpspor, Samsunspor – 9... 12. Trabzonspor – 4 (4), 13.

Çaykur Rizəspor – 4, 14. Kayserispor – 3 (4), Qaziantep – 3 (4)...
Bombardirlər: Barış Alpər Yılmaz (Qalatasaray), Ceko (Fənərbaxça), Samudio (Antalyaspor), Pyontek (İstanbul BŞ) – 4.