Bu həftə Türkiyə kubokunda finalçılar bəlli oldu. Heç bir cütdə sürpriz qeydə alınmadı və favoritlər həlledici görüşə vəsiqə qazandılar.

Çərşənbə axşamı keçirilən ilk yarımfinalda “Qalatasaray” Konyaya səfər etmişdi. İstanbul nəhənginin bu rəqiblə öz haqq-hesabı var idi. Çünki qrup mərhələsində məhz “Konyaspor” “Cim-Bom”u lider olmağa qoymamışdı. Fanatları önündə Konya klubunu yenə bilməyən “Qalatasaray” qrupda 2-ci pillə ilə kifayətlənməli olmuş və 1/4 finalda səfərdə “Fənərbaxça” ilə qarşılaşmaq məcburiyyətində qalmışdı. Amma bu dəfə “Konyaspor” evdə oynamasına baxmayaraq, meydanda heç bir varlıq göstərə bilmədi. Aşkar üstünlüyə malik olan “sarı-qırmızılar” 26-cı dəqiqədən etibarən rəqibi “top atəşinə tutdu”.

Əvvəlcə başla fərqlənən Osimhen mövsümdə 30-cu qolunu vurdu! Fasilə ərəfəsində qapıçı Osimhenin zərbəsini dəf etsə də, son vaxtlasr məhsuldarlığı artan Torreyra özünü yetirərək təkrar zərbə ilə topu tora göndərdi. İkinci hissə Şallainin baxımlı qolu ilə start götürdü. Çox keçmədən Pedrinyo qollardan birinin əvəzini çıxaraq yerli fanatları ümidləndirdi. Amma bu ümid uzun çəkmədi. Bu qoldan cəmi 2 dəqiqə sonra Şallai həm dublunu rəsmiləşdirdi, həm də faktiki intriqanı öldürdü.

Bu qoldan öncə konyalılar topun “Qalatasaray”lı futbolçudan çıxdığını və autu özlərinin atmalı olduğunu iddia etsələr də, hakimin qərarı dəyişmədi. Yekun nəticəni isə bu mövsüm kubokda 2-ci qolunu vuran Yusuf Dəmir müəyyənləşdirdi. Beləliklə, kuboku ən çox (18) qazanan komanda olan “Qalatasaray” 2019-dan bəri ilk, tarixində isə 24-cü dəfə bu turnirin finalına yüksəldi.

Yarımfinalın digər oyunu cümə axşamı Trabzonda keçirildi. 1/4 finalda süpriz şəkildə “Beşiktaş”ı mübarizədən kənarlaşdıran “Göztəpə” daha bir sensasiya edərək 55 illik fasilədən sonra ilk dəfə finala yüksəlmək arzusundaydı. Amma digər tərəfdən “Trabzonspor” üçün də bu, mövsümü xilas etmək baxımından son şans idi. Konyadakı qədər məhsuldar alınmasa da, bu matç da maraqlı keçdi. Stadionun böyük bölümünü dolduran azarkeşlər ilk yarıda qol görmədi. Əsas hadisələr fasilədən sonra yaşandı. Oyunun əlavə vaxta getməsini istəməyən və təzyiqi artıran Fatih Təkkənin komandası 2-ci hissənin əvvəllərində penalti qazandı.

Maraqlıdı ki, 48-ci dəqiqədə qazanılan penalti uzun sürən incələmədən sonra yalnız 55-ci dəqiqədə yerinə yetirildi! Amma izmirlilərin qapıçısı Arda Özçimən Banzanın zərbəsi zamanı istiqaməti düzgün müəyyənləşdirərək qola imkan vermədi. Bununla belə, qaradənizlilər qalan müddətdə lazımi nəticəni əldə edə bildilər. “Göztəpə” 78-ci dəqiqəyə qədər dözsə də, sonda “ağ bayraq qaldırdı”. Qələbə qolunu Ozan Tufan vurdu. O, künc zərbəsi zamanı müdafiəçilərin uzaqlaşdıra bilmədiyi topu bir toxunuşla və qəribə trayektoriya ilə tora göndərdi. Yekun nəticəni isə Nvakaemenin ötürməsi ilə ukraynalı vinger Zubkov müəyyənləşdirdi.

Maraqlıdı ki, “Göztəpə” bu mövsüm superliqada iki matçın heç birində bu rəqibə uduzmamışdı (evdə 2:1, səfərdə 1:1). Amma göründüyü kimi, kubokda bu uğurlu seriyanı davam etdirmək mümkün olmadı. Beləliklə, “bordo-mavililər” ardıcıl 2-ci, tarixində 17-ci dəfə finala yüksələrək “Qalatasaray”a rəqib oldular. Komanda ötən mövsüm həlledici oyunda “Beşiktaş”a boyun əymişdi (2:3).

“Trabzonspor” ölkə kubokunu tarixində 10-cu dəfə qazanmağa çalışacaq. Final görüşü mayın 14-də keçiriləcək. Türkiyə Futbol Federasiyası əvvəlcə finalın Əskişəhərdə oynanılacağını açıqlamışdı. Amma bu şəhər təhlükəsizliyə zəmanət verə bilmədiyindən final başqa şəhərdə oynanılacaq.

yarımfinal
Konyaspor – Qalatasaray 1:5
Pedrinyo, 53 – Osimhen, 26. Torreyra, 42. Şallai, 47; 55. Yusuf Dəmir, 90+1.
Qalatasaray: Günay Güvənc, Frankovski, Sançes (Metehan Baltacı, 83), Əbdülkərim Bardakcı (Kuesta, 58), Yakobs, Torreyra, Lemina (Berkan Kutlu, 59), Yunus Akgün (Ahmed Kutucu, 59), Mertens, Şallai, Osimhen (Yusuf Dəmir, 73).

Trabzonspor – Göztəpə 2:0
Ozan Tufan, 78. Zubkov, 89.
Trabzonspor: Uğurcan Çakır, Maleyro, Bataqov, Saviç, Mustafa Eskihellaç (Arif Boşluk, 88), Ozan Tufan, Lundstrem, Zubkov, Sikan (Çam, 90+6), Nvakaeme (Visça, 90+2), Banza (Enis Destan, 90+6).