''Qalatasaray'' bu yayın ilk yoxlama oyununu keçirib.

"Football-plus.az" xəbər verir ki, Türkiyə çempionu dünən 1-ci liqa təmsilçisi ''Ümraniyəspor'' ilə qarşılaşıb.

''Ümraniyə Şəhər Bələdiyyə Stadionu''nda keçirilən oyuna ''Qalatasaray'' bu heyətlə çıxıb: Cankat Yılmaz, Əli Turap Bülbül, Nelsson Kuesta, Kazımcan Karataş, Torreyra, Berkan Kutlu, Yusuf Dəmir, Zanyolo, Kön, Çağrı Balta. Fasilədə və ikinci hissənin gedişində bu oyunçular meydana daxil olub: Əbdülkərim Bardakcı, Ada Yüzgeç, Efe Akman, Arda Ünyay, Metehan Baltacı, Sara, Furkan Koç, Berat Luş, Gökdəniz Gürpüz, İsa Halidi, Barış Alpər Yılmaz.

''Qalatasaray''ın üstünlüyü ilə keçən oyunda kapitan sarğısı ilə meydana çıxan Berkan Kutlu 11-ci dəqiqədə hesabı açsa da, rəqib bu qola 16-cı dəqiqədə cavab verib. 33-cü dəqiqədə Zanyolonun, 59-cü dəqiqədə Könün qolları ilə ''sarı-qırmızılar'' 3:1-lik üstünlük yaxalayıblar. Meydan sahibləri 64-cü dəqiqədə Əbdülkərim Bardakcının səhvindən sonra fərqi minimuma endirsələr də, komandanın bundan artığına gücü çatmayıb. 69-cu dəqiqədə Metehan Baltacı ''Cim-Bom''un 4-cü qolunu vurubsa, 86-cı dəqiqədə 16 (!) yaşlı Ada Yüzgeç yekun nəticəni müəyyənləşdirib.

Beləliklə, ''Qalatasaray'' bu yayın ilk hazırlıq matçından 5:2 hesablı inamlı qələbə ilə ayrılıb. İcarədən dönən Zanyolo və Kön kimi futbolcuların istəkli oyunu diqqət çəkib. Maraqlıdı ki, bu oyunda ''Qalatasaray''ın 3 əfsanəsi - Hasan Şaş, Hakan Balta və Ayhan Akmanın övladları da iştirak etdi. Efe Akman ilə Çağrı Balta ''Qalatasaray''ın, Yusuf Dəniz Şaş isə ''Ümraniyəspor''un heyətində meydana çıxdı.

Oyunun gedişində fanatların Viktor Osimhenin lehinə dəfələrlə tezahüratlar səsləndirməsi diqqət çəkdi. Bundan başqa matçı izləyənlər arasında ''Qalatasaray'' prezidenti Dursun Özbəklə yanaşı Məsut Özil də var idi. Sabiq ünlü futbolçu Ümraniyədə futbol akademiyası açmağı planlaşdırır.

Okan Burukun qərarı ilə futbolçulara bu oyunun ardından iki günlük istirahət verilib.

Qeyd edək ki, ''Qalatasaray'' 19-23 iyul tarixində Avstriyada toplanış keçəcək. İstanbul nəhəngi burda iyulun 20-da ''Admira'', iyulun 23-də ''Kalyari'' ilə qarşılaşacaq.