“Mən bu gün “Dinamo”da sistemli iş qurmuşam. 10 yaşdan 19 yaşa qədər komandalarımız Azərbaycan çempionatının aşağı liqalarında çıxış edir. Həmçinin əsas komanda da 2-ci liqada mübarizə aparır. Sadəcə, sponsorumuzun olmaması bizə 1-ci liqaya çıxmaq üçün heyət qurmaqda çətinlik yaradır. Çempionatda oynamaqla bağlı problemimiz yoxdu. Sadəcə, inkişaf etmək, böyümək istəyirik. Sponsorumuz olmasa da, “Dinamo” yeganə klubdu ki, çətinliklər içində 300-ə qədər futbolçu ilə 10 yaş qrupunda çempionatda mübarizə aparır. Premyer-liqada çıxış edən klublar AFFA-dan 2,5 milyon manat alacaq. Biz isə həmin vəsaiti almadan bütün aşağı yaş liqalarında çıxış edirik. “Dinamo” olaraq, futbola sadiq qalmışıq, 300 gəncin 10 komanda ilə AFFA-nın liqalarında oynamasını təmin etmişik. “Dinamo”nun 2-ci liqadakı komandasında da həmin liqadan gələn şəxlər çıxış edir. Hazırda komandada 14 futbolçumuz var ki, 19 yaşı tamam olmayıb. Gələn mövsüm də prioritetimiz həmin gənclər olacaq. Biz Azərbaycan futbolunun müəyyən pilləyə qalxması üçün böyük işlər görmək istəyirik. Təəssüf ki, maliyyə durumu buna imkan vermir, çətinlik yaradır. Bu işi gördüyünə görə elita klubları o boyda vəsait alırsa, “Dinamo” bundan məhrumdu. Sözün açığı, bununla bağlı AFFA rəhbərliyinə və İcraiyyə Komitəsinə müraciət edəcəm. Məncə, bu məsələdə ədalət prinsipi bərpa olunmalıdı. Onu da nəzərə almaq lazımdı ki, bizim əziyyətlə yetişdirdiyimiz futbolçulardan yeddisi milli komandaya dəvət alıb. 42 nəfər isə premyer-liqada çıxış edən klublarda oynayır. “Dinamo” Futbol Klubu İsgəndər Cavadov Akademiyası ilə birgə Azərbaycan futboluna layiqli qüvvə hazırlamaq üçün əlindən gələni edir. Bu məsələlərdə AFFA-nın yeni rəhbərliyinin bizə dəstək olacağına inanırıq. Mən buna şübhə etmirəm. Çünki onların da niyyəti Azərbaycan futboluna xidmət etməkdi. Yəqin ki, yaxın günlərdə bu məsələ ilə bağlı müsbət məqamlar olacaq. Məqsədimiz Azərbaycan futbolunun beynəlxalq arenada layiqincə çıxış etməsidi. U-20 liqasının yaranmasını da tövsiyə edirəm. Azərbaycan Prezidenti cənab İlham Əliyev və Özbəkistan prezidenti 2027-ci ildə 20 yaşa qədər futbolçuların dünya çempionatının bu iki ölkədə keçirilməsi ilə bağlı razılıq əldə edib. Nəzərə alaq ki, Azərbaycanda U-20 komandası yoxdu. “Futbol+” vasitəsi ilə birbaşa AFFA rəhbərliyinə müraciət etmək istəyirəm ki, bu il U-20 liqasının yaranması ilə bağlı qərar qəbul olunsun. Futbolçularımız yubana bilər. AFFA İcraiyyə Komitəsi U-20 liqasının yaranması ilə bağlı qərar versə, futbol ictimaiyyəti tərəfindən çox müsbət qarşılanar. Həmçinin ev sahibi olan U-20 milli komandalarının – Azərbaycan və Özbəkistan millilərilərinin çempionatda birbaşa çıxış etməsi təmin olunsun ki, nəhayət, 20 yaşlılardan ibarət milli komandamızı dünya çempionatında görək. Premyer-liqada da legioner limiti ləğv olub, gənc futbolçulara nadir hallarda rast gələcəyik”.