"Bildiyiniz kimi, Bakı "Dinamo"su ölkə futbolumuzda özünə görə ad-sanı olan, tarix yazmış klub olub. Məhz bunu nəzərə alaraq bir qrup yoldaş yenidən "Dinamo"nu bərpa edərək dirçəltməyi qərara aldıq. Vaxtilə "Bakı"da yüksək post tutmuş Yaşar Seyidovla yaxşı münasibətlərimiz var. Ondan komandanın “sükanı arxasına” keçməyimlə bağlı təkllif gəldi, mən də müsbət qarşıladım. Ölüm-itim olmasa, "Dinamo"nu qarşıdakı mövsümdə mən çalışdıracam. Amma narahatlığımız çoxdu. Bildiyiniz kimi, komanda yenidən formalaşdırıldı və yeni liqada çıxışımıza son anda icazə verildi. Bu da bizə çox çətinliklər yaradır. Futbolçu, əsas da 2001-03 təvəllüdlü olanları tapmaqda çətinlik çəkirik. Yeni mövsümdən 1-ci liqanın daha da gücləndiyini nəzərə alsaq, əksər perspektivli futbolçular ora axışıb. Qalanlarını da 2-ci liqada iştirakı əvvəlcədən dəqiqləşən klublar heyətinə cəlb edib. Ona görə də heyəti komplektləşdirməkdə çətinlik çəkirik.  Əlimizin altında olanların mütləq əksəriyyəti gənc və təcrübəsiz oyunçulardı. Onların bir çoxu İsgəndər Cavadov futbol məktəbinin məzunlarıdı. Üç nəfər də “Bakı”nın yetirməsi olan təcrübəli futbolçulardı. Hazırda sərəncamımızda olan oyunçuların heç biriylə rəsmi müqavilə bağlamamışıq deyə, adlarını çəkə bilmirəm. Turnirə iştirakımıza icazənin gec verilməsiylə yanaşı, maliyyə məsələsində də sıxıntımız var. Hələ büdcəmizin necə olacağı da bəlli deyil. İmkan daxilində döyüşkən heyət formalaşdırmaq istəyirik. Seleksiya işlərini əsasən Region Iiqasında apararırıq. Orda perspektivli oyunçu tapsaq və imkanlarımız əl versə, heyətimizə qatacağıq. Alınsa, bir-iki təcrübəli futbolçunu da sərəncamımızda görmək istəyirik".