Yeni mövsümə hazırlıqlarını Avstriya toplanışı ilə davam etdirən ''Beşiktaş'' növbəti yoxlama oyununu keçirib.

"Football-plus.az" xəbər verir ki, daha öncə Avstriyanın aşağı liqa təmsilçilərindən ''Sankt Pelten''i 2:0 məğlub edən, ''Admira'' ilə 1:1 bərabərə qalan ''qartal'' bu dəfə Avstriyanın elita təmsilçisi ''Volfsberq'' ilə qarşılaşıb.

İstanbul nəhəngi oyuna bu heyətlə çıxıb: Mərt Günok, Svensson, Paulista, Uduoxai, Yurasek, Dəmir Ege Tıknaz, Kartal Yılmaz, Rafa Silva, Raşitsa, Mario, Abraham. 5 qolun vurulduğu oyunda Ole-Qunnar Sulşerin komandası gözlənilməz məğlubiyyətlə üzləşib. 5 qoldan 4-ü ilk yarının son anlarına təsadüf edib. Avstriyalıların ilk qoluna Dəmir Ege Tıknaz, ikinci qoluna isə cərimə zərbəsindən Kartal Yılmaz cavab verib. İlk yarısı 2:2-lik bərabərliklə yekunlaşan görüşdə ''Volfsberq'' 55-ci dəqiqədə qələbə qolunu vurdu. ''Beşiktaş''da oyunun gedişində Mustafa Həkimoğlu, Semih Kılıçsoy, Əmirhan Topçu, Haciahmetoviç, Muçi, Salih Uçan kimi futbolçular meydana çıxıb.

Yeni transfer Abraham debüt matçında heç nə ilə yadda qalmadı və fasilədə Mustafa Həkimoğlu ilə əvəzləndi. Gənc forvard isə 60-cı dəqiqədə zədələnərək yerini Semih Kılıçsoya verdi. Onun zədəsinin nə dərəcədə ciddi olması barədə məlumat yoxdu. Digər yeni transfer Orkun Kökçü isə oyunda iştirak etmədi.

''Beşiktaş'' Avstriyada son yoxlama matçını bu gün Slovakiyanın aşağı liqa təmsilçisi ''Petrjalka''ya qarşı keçirəcək və sabah İstanbula qayıdacaq.