Martın 29-da ''Qalatasaray''a qarşı keçirəcəyi derbiyə hazırlığı davam etdirən ''Beşiktaş'' yoxlama oyununda qüvvəsini sınayıb.

''Football-plus.az'' xəbər verir ki, İstanbul nəhəngi doğma ''Nevzat Dəmir'' bazasındakı məşq meydançasında 1-ci liqa təmsilçisi ''İstanbulspor''la qarşılaşıb.

Yığma üzvlərinin iştirak etmədiyi oyunda ''Qartal'' meydana bu ''11-lik''lə çıxıb: Ərsin Destanoğlu, Onur Bulut, Paulista, Tayyip Sanuç, Oksleyd-Çemberleyn, Haciahmetoviç, Salih Uçan, Rikardo, Mario, Rafa Silva, İmmobile.

Oyun hər baxımdan ''ağ-qaralar'' üçün uğursuz alınıb. Komanda gözlənilmədən 1:3 hesabı ilə məğlub olub. ''Beşiktaş''ın yeganə qolunu 50-ci dəqiqədə künc zərbəsi zamanı hücuma qoşulan mərkəz müdafiəçisi Qabriel Paulista vurub. Bundan başqa Solksyaerin komandasında iki futbolçu zədələnib. Oyuna sol müdafiəçi kimi başlayan Oksleyd-Çemberleyn hələ ilk yarıda əvəzlənibsə, Rafa Silva 64-cü dəqiqədə zədə alaraq oyuna davam edə bilməyib.

Qışda komandaya cəlb olunan yeni transfer Elan Rikardo isə 90 dəqiqə meydanda olub.