''Beşiktaş'' Türkiyə superkuboku öncəsi daha bir yoxlama oyunu keçirib.

“Football-plus.az” xəbər verir ki, İstanbul nəhəngi öz bazasında 1-ci liqa təmsilçisi ''Sakaryaspor''la qarşılaşıb. Covanni van Bronxorstun komandası meydana heç də əsas heyətlə çıxmayıb. Belə ki, İmmobile, Rafa Silva, Fernandeş, Qabriel Paulista, Raşitsa, Əl-Musrati, Semih Kılıçsoy kimi isimlər matçda iştirak etməyib. Buna baxmayaraq ''Qartal'' rəqibini 2:1 hesabı ilə yenməyi bacarıb. Komanda Dəmir Ege Tıknazın 38-ci dəqiqəyə təsadüf edən avtoqolu ilə hesabda geri düşsə də, Mulekanın 44-cü və Mustafa Həkimoğlunun 79-cu dəqiqədə vurduğu qollar ''ağ-qaralar''a əzmkar qələbə qazandırıb.

2007-ci il təvəllüdlü Həkimoğlunun ulduzu parlamaqda davam edir. Gənc forvard daha öncə iyulun 20-da Avstriya təmsilçisi QAK ilə oyunda (5:1) ilk 20 dəqiqədə 2 qol, 1 məhsuldar ötürməlik performansla diqqət çəkmişdi. Onu da bildirək ki, ''Beşiktaş'' növbəti oyununu ''Qalatasaray''a qarşı keçirəcək. Bu komandalar avqustun 3-də ''Atatürk Olimpiya''da Türkiyə superkuboku uğrunda görüşdə üz-üzə gələcək.

ƏLİ