''Qalatasaray'' dünən bu yayın ilk hazırlıq matçını keçirib.

“Football-plus.az” xəbər verir ki, Türkiyənin son çempionu Kocaeli şəhərində Acun Ilıcalının sahibi olduğu çempionşip təmsilçisi ''Hall Siti'' ilə qarşılaşıb. Hər iki klubun prezidenti Acun Ilıcalı ilə Dursun Özbək oyunu yanbayan əyləşərək tribunadan izləyiblər. Görüş qeyri-adi ssenari ilə keçib. İstanbul nəhəngi oyuna fırtına kimi başlayaraq 7 dəqiqə aralığında 3 qol vurub. 28-ci dəqiqədə Emin Bayram, 30-cu dəqiqədə Berkan Kutlu, 35-ci dəqiqədə Kaan Ayhan fərqlənib. Ingilislər fasilə ərəfəsində - 45-ci dəqiqədə Benjamin Tette ilə qollardan birinin əvəzini çıxıblar. Maraqlıdı ki, ingilislərin baş məşqçisi Layam Rozenyon fasilədə 11 futbolçunun hamısını dəyişib. Okan Buruk isə fasilədə 5 dəyişiklik edibsə, qalan əvəzetmələri ikinci hissənin gedişində həyata keçirib. Hər şey İstanbul nəhənginin qələbəsinə doğru gedərkən ''Hall Siti'' son anlarda inanılmaz bir geridönüşə imza atıb. Komanda 3 dəqiqə aralığında 3 top vurub! 83-cü dəqiqədə Sayrus Kristi, 85-ci dəqiqədə Reqan Sleyter və 86-cı dəqiqədə Oskar Estupinyan fərqlənib. Beləliklə, Türkiyə çempionu gözlənilmədən İngiltərənin aşağı liqa təmsilçisinə boyun əydi.

Qeyd edək ki, ''Qalatasaray'' ayın 8-də toplanış üçün Avstriyaya yola düşəcək. Komanda burda ilk oyununu ayın 10-da Macarıstan təmsilçisi ''Kişvarda''ya qarşı keçirəcək.

ƏLİ