''Qalatasaray'' bu yayın ikinci toplanışını Avstriyanın Ştayermark əyalətindəki İrdninq bölgəsində keçməkdə davam edir.

Dünən Türkiyə çempionu bu yayın 4-cü yoxlama oyununu keçirib. ''Cim-Bom'' Lints şəhərində A seriyası təmsilçisi ''Leççe'' ilə qarşılaşıb. Oyun Okan Burukun komandası üçün uğurlu alınıb. ''Qalatasaray'' Ziyeşin 10-cu və Zahanın 40-cı dəqiqədə vurduğu qollarla fasiləyə 2:0 üstün yollanıb. Buruk ikinci hissənin gedişində Metehan Baltacı istisna olmaqla bütün heyəti dəyişib. İkinci hissədə meydana çıxanlardan biri də İkardi olub. Argentinalı forvard bu yay ilk dəfə yoxlama matçında şans qazanıb. Maraqlıdı ki, onun meydana çıxmasından sonra ''Qalatasaray'' 4-4-2 sistemi ilə oynamağa başlayıb. Çünki Batşuayi də həmin anlarda meydanda idi. ''Leççe''nin heyətində Qaspar 85-ci dəqiqədə fərqlənməklə yekun nəticəni müəyyənləşdirib.

Xatırladaq ki, ''Qalatasaray'' Avstriyadakı toplanışın ilk hissəsində LASK-a 2:3, Düsseldorf ''Fortuna''sına 2:5 məğlub olmuşdusa, ''Trençin''i 4:1 hesabı ilə yenmişdi. Komanda növbəti oyununu iyulun 27-də İtaliyanın digər təmsilçisi ''Parma''ya qarşı keçirəcək.

ƏLİ