Abraham klub tarixinin 8-ci ingiltərəli futbolçusudu. “Beşiktaş” yeni transferini rəsmən açıqlayıb.

"Football-plus.az" xəbər verir ki, İstanbul nəhəngi hələ iyulun 1-də Türkiyəyə gətirdiyi Temmi Abraham ilə icarə əsasında birillik müqavilə imzalayıb. Keçidin şərtlərinə gəlincə, “ağ-qaralar” birillik icarə haqqı kimi “Roma”ya 2 milyon avro ödəyəcək.

Amma “qartal” şərtlərə bağlı olaraq təcrübəli futbolçunun daimi əsasda transfer hüququnu da ələ keçirib. Müqavilədəki xüsusi şərtlər həyata keçəcəyi təqdirdə Abraham 2030-cü ilə qədər daimi əsasda transfer olunacaq. Belədə “Beşiktaş” italyanlara daha 13 milyon avro ödəməli olacaq. Futbolçunun illik maaşı 6 milyon avroya bərabərdi. Komandada qalacağı təqdirdə bu məbləğ hər növbəti il 500 min avro artacaq.

Qısaca qeyd edək ki, 27 yaşlı Abraham “Çelsi”nin yetirməsidi. Bu klubla yanaşı, “Bristol”, “Suonsi”, “Aston Villa”da forma geyib. 2021-dən bəri isə karyerasını İtaliyada davam etdirirdi. İlk üç mövsümü “Roma”da keçirən ingiltərəli forvard ötən mövsüm icarə əsasında “Milan”da oynayıb. Üumumilikdə o, 2024/25-də iştirak etdiyi 44 rəsmi oyunda hesabına 10 qol, 7 məhsuldar ötürmə yazıb.

Yanvarda İtaliya Superkubokunun finalında - “Milan”ın “İnter”i 3:2 yendiyi derbidə qələbə qolunu məhz Abraham vurmuşdu. İngiltərə yığmasında isə o, 2017-22-ci illərdə 11 oyuna çıxaraq 3 qol vurub. Abraham “Beşiktaş” tarixinin 189-cu əcnəbi və 8-ci ingiltərəli futbolçusudu. Digər ingiltərəli futbolçu Aleks Oksleyd-Çemberleyn də hələ ki heyətdədi.

Bundan başqa, bu klubda son illərdə bu ölkədən Co Uorral, Natan Redmond və Dele Alli kimi oyunçular da çıxış edib. Alan Uolş, Rob Makdonald və Les Ferdinand isə “Beşiktaş”da 1980-ci illərin sonlarında forma geyib.

Abraham “Beşiktaş”ın bu yay reallaşdırdığı ikinci transferdi. Klub daha öncə çexiyalı sol cinah müdafiəçisi David Yuraseki heyətinə qatmışdı. Abrahamın müqaviləyə imza atandan dərhal sonra “Ayasofya” məscidini ziyarət etməsi diqqəti çəkib. Dediyinə görə, buranı ziyarət etməyi çoxdan arzulayırmış.

Yeri gəlmişkən, Ole-Qunnar Sulşerin başçılıq etdiyi komanda dünən Avstriyaya yollanıb. “Beşiktaş” burda iyulun 18-nə qədər toplanış keçəcək. Hər iki yeni transfer komanda ilə birlikdə toplanışa yollanıb. Amma 35 nəfərlik siyahıda Çiro İmmobile ilə Oksleyd-Çemberleynə yer tapılmayıb. Bu da onların yeni mövsümdə komandada olmayacaqlarını göstərir.

İmmobile artıq “Bolonya” ilə anlaşıb. Dünən onun Türkiyə karyerası rəsmən başa çatdı. “Ağ-qaralar” təcrübəli futbolçuya müqavilənin ləğvi üçün 2,625 milyon avro ödədilər. Elə Çemberleynin də vətəninə, yəni İngiltərəyə qayıdacağı gözlənilir.