Ötən ayın əvvəllərində ''Fənərbaxça''dan ayrılan idman direktoru Mario Brankonun yeni iş yeri bəlli olub.

"Football-plus.az" xəbər verir ki, portuqaliyalı futbol adamı artıq vətənində işləyəcək.

Belə ki, o, ''Benfika'' ilə anlaşıb. Lissabon nəhəngində daha öncə bu vəzifəni Rui Pedro Braz yerinə yetirirdi. Amma ''qartallar'' ötən mövsüm başa çatan kimi onunla yolları ayırmağı lazım bildilər.

Mario Branko ''Fənərbaxça'' ilə 2022-ci ildən əməkdaşlığa başlamışdı. Jorje Jezuşun təyinatında onun böyük rolu olmuşdu. Rəsmi olaraq isə o, İstanbul nəhəngində idman direktoru vəzifəsini 2023-cü ilin iyunundan icra etməyə başlamışdı. ''Benfika'' yeni mövsümün hazırlıqlarına iyulun 14-dən etibarən start verəcək. Branko da yeni işinə rəsmi olaraq həmin tarixdən etibarən başlayacaq.

Maraqlıdı ki, ''Fənərbaxça'' ilə ''Benfika''nın Çempionlar Liqasının təsnifat mərhələsində bir-birinə rəqib olmaq ehtimalı var. Bu komandalar həm də iyulun 26-da ''Eysebio Kuboku'' çərçivəsində qarşılaşacaqlar.