''Fənərbaxça''da ciddi dəyişikliklər davam edir.

"Football-plus.az" xəbər verir ki, Edin Ceko və Duşan Tadiç kimi ulduzlarla yollarını ayıran, Joze Mourinyonun köməkçiləri, eləcə də idman direktoru Mario Branko ilə vidalaşan İstanbul nəhəngində yeni təyinatlar reallaşıb.

''HT Spor''un məlumatına görə Brankonun yerinə idman direktoru vəzifəsinə Devin Özək gətirilib. Ancaq Yağız Sabuncuoğlunun paylaşdığı xəbərə görə yeni mövsüm üçün komandanın qurulmasında Devin Özək və Okan Özkan birlikdə yaxından iştirak edəcək. Onların konkret vəzifələri isə rəsmi açıqlamadan sonra bəlli olacaq.

Onların hər ikisinin gənc olması diqqət çəkir. Okan Özkan 1991, Devin Özək isə 1995-ci il təvəllüddü. Bir neçə universitet bitirən, İtaliyada İdman industriyası ilə bağlı təhsil alan Özkan UEFA-nın A lisenziyasına da malikdi.

Başqan Əli Koç onun haqda danışarkən ''böyük dünya görüşü olan'' və ''Fənər''ə ürəkdən bağlı olan'' ifadələrini işlətmişdi. O, klubun transfer siyasətində yaxın rol oynayacaq, ''altyapı'' ilə əsas komanda arasındakı əlaqəni gücləndirəcək və rəqiblərin analizində də yaxından iştirak edəcək. Devin Özək isə Almaniyada doğulub. Anası alman, atası türk olan Özək 21 yaşına qədər aşağı liqalarda futbol oynasa da, 2016-cı ildən etibarən belə desək, meydanın kənarına keçdi. 2017-ci ildə şəxsi əlaqələri ilə tanış olduğu ''Bayer-04''ün üzvü Simon Rolfesə məxsus şirkətdə skaut kimi çalışmağa başladı. 2021-ci ildə Rolfesin də məsləhəti ilə Leverkuzen klubu faktiki olaraq onu skaut vəzifəsinə gətirdi. Həmin vaxt Özəkin cəmi 26 yaşı var idi. İldən ilə onun klubda vəzifəsi dəyişdi.

İddialara görə Xabi Alonsonun təyinatında, eləcə də Qrimaldo və Bonifeys kimi ulduzların transferində, Diabinin ''Aston Villa''ya transfer olunmasında gənc futbol adamı mühüm rol oynamışdı. B lisenziyasına malik olan Devin Özək türk, alman və ingilis dilində gözəl danışmağı bacarır.

Onun bu yay ''Fənərbaxça''da transferlərdə əsas söz sahiblərindən olacağı, eləcə də rəhbərliklə futbolçular arasında körpü rolunu oynayacağı gözlənilir.