''Fənərbaxça''nın idman direktoru Mario Branko ilə bağlı sürpriz xəbər yayılıb.

Belə ki, ''Spartak'' bu futbol adamının xidmətində maraqlıdı. Moskva nəhəngi hazırda idman direktoru axtarışındadı. Çünki yanvardan bu yana bu vəzifəni icra edən Tomaş Amaral noyabrın 10-da öz istəyi ilə istefa verdi. Avrokuboklarda iştirakdan məhrum edilən Rusiya klubları Avropadan oyunçu almaqda çətinlik çəkir. Bu üzdən onlar əsasən Cənubi Amerikadan futbolçular gətirir. Branko isə Cənubi Amerika ''bazarını'' gözəl tanıyır. Bu üzdən ''Spartak'' onunla anlaşmaq istəyir. Amma Rusiya mənbələrinin yazdığına görə ''ağ-qırmızılar'' ''Latsio''da eyni vəzifəni icra edən İqli Tareyə də maraq göstərir.

Deyilənə görə Tare çempionluğa oynayan bir klubda işləmək istədiyi üçün Branko ilə müqayisədə o, Rusiyaya yollanmaqda daha çox maraqlıdı. Ən son həmyerlisi Joze Mourinyonun ''Fənərbaxça''ya gəlməsində heç də az rol oynamayan Brankonun mövsümün ortasında bu layihəni atıb ''Spartak''a yollanacağı inandırıcı görsənmir.

Amma moskvalıların layihəsindən və təklif edəcəyi məbləğdən də çox şey asılı olacaq. 19 ildi bu sahədə olan, indiyə qədər bir çox klublarda işləyən, hətta Portuqaliya Futbol Federasiyasında da çalışan, eləcə də 6 dil bilən Branko ''Fənərbaxça'' 2023-ün yayından işləyir.

ƏLİ