Çətinliklə də olsa, “Jalgiris” səddini aşaraq Çempionlar Liqasında yoluna davam edən “Qalatasaray”ı artıq sabah 3-cü təsnifat mərhələsinin ilk oyunu gözləyir.

“Football-plus.az” xəbər verir ki, Türkiyə çempionu səfərdə Sloveniya çempionu “Olimpiya” ilə qarşılaşacaq. Lyublyanada yerləşən 16 min yerlik “Stojitse” stadionunda keçiriləcək qarşılaşma Bakı vaxtı ilə saat 23.00-da başlayacaq. İstanbul nəhəngi dünən günorta saatlarında Lyublyanaya yollanıb. Maraqlıdı ki, bir sıra önəmli futbolçular komandanın düşərgəsində yer almayıb. Fanatları ilk növbədə yeni transfer Uilfrid Zaha ilə Nikolo Zanyolonun durumu maraqlandırırdı. Hər iki futbolçu oyunu buraxmalı olacaq! Zaha hələ də tam hazır deyil. Zanyolo isə “Jalgiris”ə qarşı ilk oyunda aldığı zədənin ağrılarından hələ də qurtulmayıb. Digər yeni transfer Kərəm Dəmirbayın adı hələ ki iştirak ərizəsinə salınmadığından o da komandaya yardım edə bilməyəcək. Amma yaxşı xəbərlər də var. Fanatların sevimlisi Mauro İkardi və zədəsini sağaldan Lukas Torreyra komanda ilə birlikdə Sloveniyaya yollanıb.
Bir qədər də “Qalatasaray”ı tərk etmək ehtimalı olan oyunçular barədə danışaq. Bu futbolçuların başında Olimpiu Morutsan gəlir. “Jalgiris”lə oyunlar üçün adı iştirak ərizəsində olan rumıniyalı vinger “Olimpiya” ilə oyundan öncə ərizədən çıxarılıb. Bu da o deməkdi ki, 24 yaşlı futbolçu artıq Okan Burukun planlarına daxil deyil. Yeri gəlmişkən, son günlərdə Morutsanın icarə əsasında “Neftçi”yə keçəcəyi ilə bağlı şayiələr yayılmışdı. Amma futbolçunun meneceri Covanni Bekali Rumıniyanın idman portallarından birinə açıqlamasında bu xəbəri təkzib edib: “Qalatasaray” Morutsanı ya Türkiyə, ya da İtaliya klublarından birinə icarəyə verəcək. “Konyaspor”, “Palermo” və “Sampdoriya”dan təkliflər var. “Neftçi”? Xeyr, “Neftçi” Morutsana maraq göstərmir”.

Xatırladaq ki, 2021-in yayında FKSB-dan 4,2 milyon avroya transfer edilən və ilk mövsümdə ümidləri doğrultmayan Rumıniya yığmasının üzvü ötən mövsümü icarə əsasında İtaliyanın B seriyası təmsilçisi “Piza”da keçirmişdi. Ümumiyyətlə, bu transfer dönəminin sonuna qədər “Cim-Bom”da sürpriz ayrılıqlar baş tuta bilər. Məsələn, Berkan Kutlu və Yunus Akgün üçün ən azı 5 milyon avroluq təklif gəlsə, “Qalatasaray” bu oyunçuları satacaq. 6 milyon avroya alınmasına rəğmən, heç cür özünü göstərə bilməyən Yusuf Dəmir də bu yay ayrılacaq. Midtşöyə “İstanbul BŞ” və “Verona” ciddi maraq göstərir. Torreyra isə “Napoli”nin hədəfindədi. Neapollular 15 milyon avroluq təkliflə “sarı-qırmızılar”ın “qapısını döyməyə” hazırlaşır.