''Fənərbaxça'' ilə müqavilə müddəti başa çatan və ''Beşiktaş''la anlaşan Brayt Osayi-Samuelin transferinin son anda düyünə düşdüyünü xəbər vermişdik. ''Qartal''ın prezidenti Sərdal Adalı futbolçunun atasının yersiz istəkləri üzündən bu transferdən vaz keçdiklərini açıqlamışdı.

"Football-plus.az" xəbər verir ki, bu olayın detalları bəlli olub.

''Ağ-qaralar'' nigeriyalı cinah müdafiəçisi ilə illik 1,9 milyon avro maaş olmaqla üçillik anlaşma əldə etmişdilər. Amma sən demə sonradan futbolçunun atası Nelson Osayi ''Beşiktaş'' rəhbərliyi ilə əlaqə quraraq onlardan hər mövsüm üçün əlavə 300 min avro tələb edib. Transferin baş tutmama səbəbi məhz budu.

Türkiyəli jurnalist Fatih Doğanın paylaşdığı xəbərə görə Osayi-Samuelin özünün bundan xəbəri olmayıb. O, hadisədən xəbər tutduqdan sonra Sərdal Adalıya zəng vuraraq üzrxahlıq edib və yenidən görüşmək istədiyini bildirib. Amma başqan onun istəyini geri çevirərək bu transferin üzərindən birdəfəlik xətt çəkib.

Yeni iddialara görə artıq Osayi-Samuel də ''Beşiktaş''dan əlini üzərək alternativ variantlara yönəlib. 27 yaşlı futbolçunun çempionşip təmsilçisi ''Birmingem'' ilə anlaşdığını deyilir. Beləcə Osayi-Samuelin 4,5 illik Türkiyə macərası başa çatmış oldu.