''Fənərbaxça''nın aparıcı futbolçularından olan Brayt Osayi-Samuel ilə bağlı sürpriz xəbərlər var.

''Football-plus.az'' xəbər verir ki, ingiltərəli futbolçunun ''Fənər'' macərası başa çatmaq üzrədi. Məsələ burasındadı ki, 27 yaşlı cinah oyunçusunun klubla müqavilə müddəti mövsümün sonunda başa çatacaq. Rəhbərlik neçə aydı, onunla müqaviləni yeniləməyə çalışır. Amma Osayi-Samuellə anlaşmaq mümkün olmadı. Futbolçunun indiki qazancı 1,8 milyon avrodu.

''Sarı-lacivərdlilər'' ona 2 milyon avrodan olmaqla 3 illik müqavilə təklif ediblər. Bu təklif hələ oktyabrdan qüvvədədi. Amma Osayi-Samuel illik 2,5 milyon avro maaş tələbindən sona qədər də vaz keçmədi. NTV kanalının məlumatına görə danışıqlar tamamilə dayandırılıb və bu andan etibarən istədiyi klubla danışıqlar aparmaq imkanı olan Osayi-Samuel ''qara dəftərə'' salınıb. Onun adı ikinci dövrə üçün Türkiyə Futbol Federasiyasına göndəriləcək iştirak ərizəsinə salınmayacaq. Qısası qeyri-adi bir şey baş verməsə Osayi-Samuel bir daha ''Fənərbaxça'' forması geyməyəcək!

İstanbul nəhəngi bu futbolçunu 2021-in yanvarında KPR-dən 508 min avroya transfer etmişdi. Osayi-Samuel bu mövsüm 24 rəsmi oyunda forma geyərək aktivinə 1 məhsuldar ötürmə yazıb. Bu arada Osayi-Samuelin yerinə transfer ediləcək futbolçu da artıq bəllidi. Bu, ''Srvena Zvezda''nın cinah müdafiəçisi Oqnyen Mimoviçdi. ''Fənərbaxça'' həm futbolçunun özü, həm də klubu ilə artıq anlaşma əldə edib.

Transferin bitdiyini ''Yanq Boyz''a qarşı son ÇL matçının ardından ''Srvena''nın baş məşqçisi Vladan Miloyeviç də açıqladı. 20 yaşlı istedadlı futbolçu ''Fənər''ə 8,5 milyon avroya başa gələcək və onunla 4,5 illik müqavilə imzalanacaq. Sonrakı satışdan 20 faiz pay da serbiyalılara veriləcək.

Mimoviçə Fransa və İngiltərədən də ciddi təkliflər var idi. Amma o, Kostiç, Tadiç kimi həmyerlilərinə və Joze Mourinyo amilinə görə ''Fənər''i seçdi. Mimoviç bu mövsüm ÇL-də 7 oyun da daxil olmaqla son 2 mövsümdə Serbiya çempionunun heyətində 33 rəsmi oyun keçirərək aktivinə 1 qol, 3 məhsuldar ötürmə yazıb.

ƏLİ