''Fənərbaxça''da yeni müqaviləyə imza atmaq istəmədiyi üçün bir qədər gözdən düşən Brayt Osayi-Samuel ''transfer pəncərəsi''nin son günündə klubdan ayrıla bilərmiş.

"Football-plus.az"ın məlumatına görə, bu xəbəri İngiltərəli idman müxbiri Pit Orurke paylaşıb.

Onun sözlərinə görə fevralın 3-də ''Fulhem'' ''Fənər''ə rəsmi təklif irəli sürübmüş. Amma İstanbul nəhəngi premyer-liqa təmsilçisinin təklifini geri çeviribmiş. Bununla belə ''Fulhem'' Osayi-Samueli diqqətdə saxlamaqda davam edəcək və mövsümün sonunda onu azad agent statusunda heyətə qatmağa çalışacaq. Xatırladaq ki, 27 yaşlı futbolçunun müqavilə müddəti bu yay başa çatacaq.

Bir müddət öncə Türkiyə mətbuatında Joze Mourinyonun artıq bu futbolçunu oynatmayacağı, eləcə də onun adının ikinci dövrə üçün TFF-yə göndərilən iştirak ərizəsindən çıxarılacağı barədə şayiələr yayılmışdı. Daha sonra ''Fənər'' müdafiənin sağ cinahını, yəni məhz Osayi-Samuelin oynadığı mövqeni ''Srvena Zvezda''lı Oqnen Mimoviç ilə gücləndirdi. Bu futbolçunun kubokda ''Ərzurumspor''a qarşı oyunda debüt edəcəyi gözlənilir. Osayi-Samuel ''Çaykur Rizəspor''a qarşı son matçı əvvəldən sona qədər ehtiyat oyunçular skamyasında keçirdi. Bəzi mənbələr onun ''Qalatasaray''la da gizli danışıqlar apardığını iddia edir. Guya Osayi-Samuel Batşuayinin ötən yay etdiyi hərəkəti təkrarlayaraq sərbəst oyunçuya çevrildikdən sonra əzəli rəqibə transfer olunacaq. Bu arada təcrübəli futbolçu ''instaqram'' səhifəsinin hekayə bölümündə diqqətçəkən bir paylaşım edib. Qum saatının şəklini qoyan Osayi-Samuel ''əziz dostlarım, eşitdiyiniz hər şeyə inanmayın. İnsanların sizə söylədiklərini diqqətli şəkildə incəliyin və sonra qərar verin'' sözlərini yazıb. 2021-in yanvarından ''sarı-lacivərdlilər''in şərəfini qoruyan nigeriyalı futbolçu bu mövsüm 24 rəsmi oyunda iştirak edərək aktivinə 1 məhsuldar ötürmə yazıb.

Onu da bildirək ki, Türkiyədə qış transfer dönəmi fevralın 11-də bağlanacaq.

ƏLİ