''Şaxtyor''un başına keçməklə məşqçi kimi Avropada ilk təcrübəsini yaşamağa başlayan Arda Turan acı bir sürprizlə üz-üzə qalıb.

"Football-plus.az" xəbər verir ki, gənc türkiyəli mütəxəssis Ukrayna nəhənginin başına keçdikdən sonra ''Şaxtyor''un Türkiyə çempionatında çıxış edən bəzi ulduzlara maraq göstərdiyi iddia edilmişdi. Onların arasında Ahmed Kutucu, İsmayıl Yüksək, Barış Alpər Yılmaz və Uğurcan Çakır kimi isimlərin adları çəkilirdi. Amma sən demə ''Şaxtyor'' özü əsas oyunçularından birini Türkiyəyə göndərməyə yaxındı. Söhbət Artyom Bondarenkodan gedir.

Donetsklilərin 24 yaşlı oyun qurucusu ''Trabzonspor''la danışıqlar aparır. ''Fanatik''in xəbərinə görə qaradənizlilər hələ ötən mövsümün qış transfer dönəmindən bu futbolçunu diqqət mərkəzində saxlayır. Həmin vaxt transfer baş tutmasa da, indi keçidin alınmaq ehtimalı günü-gündən artır. Danışıqlar prosesi davam edir. Özü də nəzərə alaq ki, Trabzon son dönəmlərdə sanki ukraynalı futbolçuların ikinci vətəninə çevrilib. Hazırda bu klubda Bataqov, Sikan və Zubkov olmaqla 3 ukraynalı çıxış edir.

Bondarenkonun da gəlişi ilə onların sayı 4-ə çata bilər. Hərçənd premyer-liqa klublarından təklif alan Bataqovun klubdan ayrılmaq ehtimalı var. Transfer dəyəri 10 milyon avro olan Bondarenkonun ''Şaxtyor''la 2028-ci ilə qədər müqaviləsi var.

Tək mərkəzdə yox cinahlarda da oynamağı bacaran universal futbolçu geridə qoyduğumuz mövsümdə 41 rəsmi oyunda aktivinə 12 qol, 8 məhsuldar ötürmə yazıb.