Klublararası Dünya Çempionatına yalnız xüsusi dəvət ilə qatılan və turnirin ən zəif klublarından biri hesab olunan ''İnter Mayami'' futbol dünyasını təəccübləndirməkdə davam edir.

"Football-plus.az" xəbər verir ki, ilk iki tura 4 xal toplayan bu kollektiv qrupun son oyununda Braziliya nəhəngi ''Palmeyras'' ilə üz-üzə gəldi.

''Portu'' ilə qarşılaşmada qələbə qolunu vuran Lionel Messi ön plana çıxmışdısa, bu dəfə Luis Suares liderlik keyfiyyətlərini nümayiş etdirdi. Ünlü uruqvaylı forvard Tadeo Allendenin vurduğu ilk qolda aktivinə məhsuldar ötürmə yazdısa, ikinci qolu özü vurdu. Özü də 3 rəqibindən sıyrıldıqdan sonra! 79-cu dəqiqəyə qədər hesabda öndə olan ''İnter Mayami'' qalib gələcəyi təqdirdə qrupu lider kimi tamamlayaraq pley-offda ''Botafoqo'' ilə qarşılaşacaqdı. Amma ''Palmeyras'' 80 və 87-ci dəqiqələrdə gələn qollarla geridönüş etməyi bacardı. Suaresin qəhrəmanlığı qələbə üçün yetmədi. ''İnter Mayami'' pley-offda Çempionlar Liqasının son qalibi və Messinin sabiq klubu PSJ-nin rəqibi oldu.

Maraqlıdı ki, klub və yığma səviyyəsində indiyə qədər Messinin şərəfini qoruduğu kollektivlər heç vaxt qrupda qalmayıb. Messi heyətdə olduqda onun komandaları indiyə qədər 33 halın 33-də də qrupdan çıxmağı bacarıblar!