“İmişli” baş məşqçi postuna 56 yaşlı Xorxe Kaskilyanı gətirib.

"Football-plus.az" xəbər verir ki, portuqaliyalı 2006-cı ildə futbolçu karyerasını bitirəndən dərhal sonra məşqçiliyə başlayıb. O, Braqa regional çempionatının həvəskar komandası “Santa Mariya”nı çalışdırıb. 2007-ci ildə “Valvedes”ə baş məşqçi təyin olunan məşqçi bir il sonra da “Merelinense”ni çalışdırdı.

Xüsusi uğuru ilə yadda qalmayan mütəxəssisin ən uzunmüddətli iş yeri 2009-13 aralığında çalışdırdığı “Moreyrense” olub. 2011/12 mövsümünün sonunda bu komandanı elitaya yüksəldib. Ancaq “Moreyrense” növbəti mövsüm yenidən aşağı dəstəyə yuvarlanıb. Kaskilya 2014-cü ilin martında 2-ci liqa təmsilçisi “Leykşoes”lə anlaşsa da, müsahibəsində klubun adına xələl gətirən fikirlərə görə apreldə qovulub.

Daha sonra “Uniao Leyriya”, “Akademiko Vizeu”, “Uniao Madeyra”, “Jil Visente”, “Leykşoes”, “Kova Pyedad” və “Trofense” klublarını çalışdırıb. 2023-cü ilin martından işsiz olan mütəxəssis indi “İmişli”dədi. Niyə? Hansı uğuruna görə? “Sportinq” üzərində 12 il əvvəl qazandığı qələbəyə, yoxsa 13 il əvvəl 2-ci liqadan elitaya klub qaldırdığına görə?

2 il yarımdı işsiz olan məşqçi işlədiyi son altı klubda 6 aydan çox olmayıb. “İmişli” baş məşqçinin tanıtmasında 20+ il təcrübə yazıb. Hardadı 20+ il? 2006-cı ildən başlayıb, 2023-cü ildən işsizdi. Bundan əvvəl də üç il klubsuz qalıb. Toplamda heç 10 il təcrübəsi olmayan, işlədiyi klublardan ya biabırçı nəticələrə, ya da danışığını bilmədiyinə görə qovulan məşqçi Azərbaycanda nə edə bilər? Ölkəni tanımayan, xəbərdar olmayan məşqçi və onun heyəti aranlıları elitada saxlaya biləcək? İnandırıcı deyil. Uzağı 1-ci liqaya düşüb, yenidən yüksəlib bunu bayram kimi qeyd edə bilərlər.

Bir sözlə, onu deyə bilərik ki, “İmişli” rəhbərliyi belə addım atmaqla elitaya hazır olmadığını göstərir, ya da sadəcə, kiminsə sifarişini yerinə yetirir.

MÜZƏFFƏR QULUZADƏ