Viktor Valdes dörd ildən sonra məşqçiliyə qayıdıb. “Barselona”nın və İspaniya yığmasının sabiq qapıçısı “Real Avila”ya baş məşqçi təyin olunub.

Bu barədə İspaniyanın 4-cü liqasında çıxış edən klubun mətbuat xidməti məlumat yayıb. 43 yaşlı mütəxəssis ilə birillik müqavilə imzalanıb.

Xatırladaq ki, Valdesin sonuncu iş yeri 2020/21 mövsümündə çalışdırdığı “Orta” klubu olub. Futbolçu karyerasını 2017-ci ildə “Midlsbro”da başa vuran sabiq qapıçı 2018-19-cu illərdə “Moratalas”ın, 2019-cu ildə isə “Barselona”nın yeniyetmələrdən ibarət komandasına başçılıq edib.