Joze Mourinyonun ''Fənərbaxça''ya verdiyi nadir faydalardan biri Yusuf Akçiçəkin ulduzunun parlaması oldu. Portuqaliyalı mütəxəssis gənc müdafiəçiyə bəzi önəmli qarşılaşmalarda şans verməyə çəkinmədi.

"Football-plus.az" xəbər verir ki, 19 yaşlı futbolçu öz oyunu ilə yaxşı mənada təəccübləndirdi və Avropa klublarının diqqətini cəlb etməyi bacardı. Ona maraq göstərən klubların siyahısı durmadan artır. İndi də bu siyahıya premyer-liqa təmsilçisi ''Vulverhempton'' qoşulub.

Bu klubu Mourinyonun həmyerlisi, ''Fənərbaxça'' camiəsini yaxından tanıyan Vitor Pereyra çalışdırır. İki fərqli dönəmdə ''sarı-lacivərdlilər''də işləyən Pereyra rəhbərlikdən Yusufun transferini tələb edib. O, Akçiçəki 3 mərkəz müdafiəçili sistemin solunda oynatmaq istəyir. Amma istedadlı futbolçuya ''Marsel'', eləcə də bundesliqa təmsilçiləri - ''Ştutqart'' və ''Ayntraxt''ın da ciddi marağı davam edir. ''Fənər'' rəhbərliyi Yusufu 20 milyon avrodan aşağı məbləğə satmaq niyyətində deyil. İddialara inansaq, İstanbul nəhəngi bir müddət öncə ''Marsel''in 15 milyon avroluq təklifini geri çevirmişdi. 193 sm boya malik olan Yusuf Akçiçək geridə qoyduğumuz mövsümdə 21 rəsmi oyunda gorma geyərək aktivinə 2 qol, 1 məhsuldar ötürmə yazıb.

''Fənər''lə 2028-ə qədər müqaviləsi olan bu futbolçunun ''Transfermarkt'' portalında yeni dəyəri 12 milyon avro göstərilib. Halbuki ötən yay onun dəyəri 5,5 milyon avro idi. O, Türkiyə çempionatında çıxış edənlər arasında son bir ildə dəyərini ən çox (6,5 milyon avro) yüksəldən futbolçudu.